Aitystyń «aqbereni» Áselhan aqynmen kezdesý ótti
Poeziialyq keshke Otyrar aýdanynyń ákimi Erlan Aitahanov qatysyp, aitys súier qaýymnyń ystyq yqylasyna bólene júrip qanshama jyr súleilerin shyńdap, aitys dodasyna qanat qaqtyrǵan halyq aqynynyń halyq aldyndaǵy poeziialyq esep berý keshimen quttyqtady.
– Ózi de – óleń, ómiri de – óleń erge bergisiz qaisarlyq pen danalyqtyń iesi, qazaqtyń Áselhany aitystyń dińgegi berik aqbereni atansa, qulyndai baptaǵan shákirtteri pyraqtai top jaryp, qazaq ádebieti men mádenietine de airyqsha úles qosyp keledi. Qara sózde – kie bar. Qara sózde – júie bar. Uiqaspen órilgen árbir óleń jolynda aqyn ananyń arqasyna arqalaǵany urpaqtyń ulaǵaty, uldyń ulyqty abyroiy, qyzdyń ómirlik tárbiesi ekeni birden ańǵarylady. Áli de daryn darabozdaryn baptap, dańqyn asqaqtata bererińizge senemiz. Ǵumyr jasyńyz uzaq, denińiz saý bolsyn, – degen Erlan Qýanyshuly aqyn anaǵa arnaǵan syilyǵyn tabystady.
Arqaly aqynnyń shyǵarmashylyq keshine Qazaqstannyń eńbek sińirgen qairatkeri, halyqaralyq «Alash» syilyǵynyń laýreaty, «Qurmet» ordeniniń iegeri, jazýshy-dramatýrg, tarihshy Erkinbek Turysov jáne Beket Turǵaraev, Marhabat Baiǵut, Narmahan Begalyuly, Baian Tilenshina, Sársen-Bek Sahabat syndy ziialy qaýym ókilderi aqynnyń shabytty shyǵarmashylyǵy jolyndaǵy el úlgi alar, keleshekke tanymdy, tálimdi iz salar isteri jóninde oi bólisti.
Túrkistan oblysynda juldyzdai jarqyrai shyǵyp, dúiim el aldynda qara sózdiń qadiri men qasietin oramdy oi, ótkir de shyraily tilmen tyńdarman júregine jetkizip, qoǵamǵa qozǵaý salar sardar sózdi tergen aqynnyń shákirtteri Marjan Esjanova, Anar Japparqulova, Dáýren Aqsaqalovtar ustazdaryna jyrdan shashý shashyp, qazirgi tańda ustazdan úlgi alǵan shákirtter ustazǵa ainalyp, jańa býynnyń óner jaýqazyndaryn jaiqaltýǵa kúsh salyp jatqandyqtaryn da jetkizdi.
Rýhani mánge toly mádeni sharany qalalyq «Otyrar» ǵylymi-ámbebap kitaphanasynyń direktory Kúliia Aidarbekova júrgizdi.
Kesh aiasynda aqynnyń sózine jazylǵan ánder shyrqalyp, óleńderi oqyldy.
Otyrar aýdany ákiminiń baspasóz qyzmeti
