ادۆوكات باۋىرجان ازانوۆ ەل ٸشٸندە "قۇقىق قورعاۋشى" رەتٸندە تانىلعان ايتبەك امانگەلدٸگە ساۋال قويدى. ايتۋىنشا, امانگەلدٸ قاڭتار قۇرباندارى مەن ولاردىڭ وتباسىنا كٶمەك كٶرسەتۋ ماقساتىندا قۇرىلعان قوردان اقشا العان, دەپ حابارلايدى Dalanews.kz.
ادۆوكات امانگەلدٸنٸڭ ەشقاشان زاڭگەرلٸك قىزمەتپەن اينالىسپاعانىن ايتادى. اشىق دەرەككٶزدە ونىڭ تەك ماركەتينگ, قارجى, IT سالاسىندا ەڭبەك ەتكەنٸ كٶرسەتٸلگەن.
"ايتبەك ەشقاشان ادۆوكاتتىق كۋەلٸك الماعان, سوت پروتسەسٸنە قورعاۋشى رەتٸندە رەسمي قاتىسپاعان. سوندا QANTAR قورىنان ناقتى قانداي قىزمەتٸ ٷشٸن اقشا الىپ جٷر? ەگەر سول بٸر قيىن شاقتا جەبٸر كٶرگەن وتباسىلارعا كٶمەك كٶرسەتسە, دەلەل ۇسىنسىن. زاڭ سالاسىندا كەسٸبي ستاتۋسى جوق ازاماتتىڭ قوردان اقشا الۋى قانشالىقتى قيسىندى?", – دەيدٸ ازانوۆ.
ادۆوكات قوردىڭ قاڭتار قۇرباندارىنىڭ جاقىندارىنا كٶمەك بەرۋ, جەبٸرلەنۋشٸلەرگە قۇقىقتىق قولداۋ كٶرسەتۋ ماقساتىندا قۇرىلعانىن ەسكە سالىپ وتىر.
"ادامگەرشٸلٸك تۇرعىسىنان ٶزگەنٸڭ قايعىسىنان پايدا تابۋ دۇرىس ەمەس. ايتبەك قاڭتار قورىنان قانداي ماقساتتا اقشا العانىن تٷسٸندٸرۋٸ كەرەك. ٷنسٸز قالعان جاعدايدا قوردىڭ قارجىسى كٸمنٸڭ قالتاسىنا اۋىپ جاتىر دەگەن زاڭدى ساۋال تۋادى", – دەيدٸ ازانوۆ.
ادۆوكات قور جۇمىسىنان اشىقتىق پەن ايقىندىقتى تالاپ ەتۋدە. ايتۋىنشا, قوردىڭ ەربٸر تەڭگەسٸ ماقساتتى جۇمسالۋى تيٸس.
«QANTAR قورى ناقتى كٸمگە كٶمەكتەسەدٸ? جاپا شەككەن قاۋىم قالىس قالىپ جاتقان جوق پا?", - دەيدٸ مامان.
