قازاقستاندا مەكتەپتەگى تجب مەن بجب سياقتى باعالاۋ جۇيەسىنە قاتىستى پىكىرتالاس ءجيى كوتەرىلىپ كەلەدى، دەپ حابارلايدى Dala News.
كەيبىر اتا انالار مەن مۇعالىمدەر بۇل فورماتتى الىپ تاستاۋ كەرەك دەپ ساناسا، ساراپشىلار ماسەلەنى عىلىمي نەگىزدە قاراستىرۋ قاجەت ەكەنىن ايتادى.
ءماجىلىس دەپۋتاتى اسحات ايماعامبەتوۆ بۇل ماسەلەدە شەشىم جەكە پىكىرگە ەمەس، عىلىمي زەرتتەۋلەرگە سۇيەنۋى كەرەك ەكەنىن اتاپ ءوتتى.
«مەن بۇل ماسەلەگە قاتىستى جەكە پىكىر نەمەسە كوممەنتاريي بەرگىم كەلمەيدى. ەكىنشىدەن، قابىلداناتىن شەشىم عىلىمي نەگىزگە سۇيەنۋى كەرەك. مىسالى، ءبىلىم باسقارماسىنىڭ باسشىسى سولاي ويلايدى ەكەن، مينيستر سولاي ويلايدى ەكەن، دەپۋتات نەمەسە ءمۇعالىم سولاي ويلايدى ەكەن دەگەن ۇستانىممەن شەشىم قابىلدانباۋى ءتيىس»، - دەدى دەپۋتات.
دەپۋتاتتىڭ ايتۋىنشا، ءبىلىم بەرۋ جۇيەسىندەگى وزگەرىستەر ناقتى زەرتتەۋلەرگە نەگىزدەلۋى قاجەت. ەگەر بەلگىلى ءبىر جۇيەنىڭ تيىمسىزدىگى عىلىمي تۇرعىدان دالەلدەنسە عانا وزگەرىس ەنگىزۋ ورىندى بولادى.
«شەشىم مىندەتتى تۇردە عىلىمي زەرتتەۋلەرگە نەگىزدەلۋى كەرەك. ەگەر ناقتى زەرتتەۋلەر جۇرگىزىلىپ، ونىڭ ناتيجەسى بەلگىلى ءبىر جۇيەنىڭ ءتيىمسىز ەكەنىن دالەلدەسە، وندا سول زەرتتەۋلەرگە سايكەس ءتيىمدى شەشىم قابىلدانۋى قاجەت. ءبىراق ول ەشكىمنىڭ جەكە پىكىرى بولماۋى كەرەك. ول زەرتتەۋلەرگە نەگىزدەلگەن ناقتى شەشىم بولۋى ءتيىس»، - دەپ اتاپ ءوتتى ايماعامبەتوۆ.
سونىمەن قاتار ايماعامبەتوۆ تجب مەن بجب فورماتى حالىقارالىق تاجىريبەدە كەڭ تارالعانىن دا اتاپ ءوتتى. ونىڭ سوزىنشە، بۇل جۇيە مازمۇنى جاعىنان بۇرىننان قولدانىلىپ كەلە جاتقان باقىلاۋ جۇمىستارىنىڭ ءبىر ءتۇرى.
«ال كوپتەن بەرى كوتەرىلىپ جۇرگەن تجب سياقتى ماسەلەلەرگە كەلسەك، بۇل الەمدە كەڭىنەن قولدانىلىپ وتىر. شىن مانىندە، ونىڭ ەرەكشە جاڭالىعى جوق. اتى عانا وزگەرگەنىمەن، مازمۇنى بۇرىننان بار باقىلاۋ جۇمىستارىنا ۇقسايدى. مىسالى، ەسسە فورماتىنداعى تاپسىرمالار، ديكتانت نەمەسە باسقا دا باقىلاۋ جۇمىستارى فورماتىندا وتكىزىلەدى»، - دەپ قورىتىندىلادى دەپۋتات.
دەپۋتاتتىڭ پىكىرىنشە، بۇل ماسەلەمەن ءتيىستى سالالىق قۇرىلىمدار كاسىبي تۇرعىدا اينالىسۋى كەرەك.
