Qazaqstanda mekteptegi TJB men BJB siiaqty baǵalaý júiesine qatysty pikirtalas jii kóterilip keledi, dep habarlaidy Dala News.
Keibir ata analar men muǵalimder bul formatty alyp tastaý kerek dep sanasa, sarapshylar máseleni ǵylymi negizde qarastyrý qajet ekenin aitady.
Májilis depýtaty Ashat Aimaǵambetov bul máselede sheshim jeke pikirge emes, ǵylymi zertteýlerge súienýi kerek ekenin atap ótti.
«Men bul máselege qatysty jeke pikir nemese kommentarii bergim kelmeidi. Ekinshiden, qabyldanatyn sheshim ǵylymi negizge súienýi kerek. Mysaly, bilim basqarmasynyń basshysy solai oilaidy eken, ministr solai oilaidy eken, depýtat nemese muǵalim solai oilaidy eken degen ustanymmen sheshim qabyldanbaýy tiis», - dedi depýtat.
Depýtattyń aitýynsha, bilim berý júiesindegi ózgerister naqty zertteýlerge negizdelýi qajet. Eger belgili bir júieniń tiimsizdigi ǵylymi turǵydan dáleldense ǵana ózgeris engizý oryndy bolady.
«Sheshim mindetti túrde ǵylymi zertteýlerge negizdelýi kerek. Eger naqty zertteýler júrgizilip, onyń nátijesi belgili bir júieniń tiimsiz ekenin dáleldese, onda sol zertteýlerge sáikes tiimdi sheshim qabyldanýy qajet. Biraq ol eshkimniń jeke pikiri bolmaýy kerek. Ol zertteýlerge negizdelgen naqty sheshim bolýy tiis», - dep atap ótti Aimaǵambetov.
Sonymen qatar Aimaǵambetov TJB men BJB formaty halyqaralyq tájiribede keń taralǵanyn da atap ótti. Onyń sózinshe, bul júie mazmuny jaǵynan burynnan qoldanylyp kele jatqan baqylaý jumystarynyń bir túri.
«Al kópten beri kóterilip júrgen TJB siiaqty máselelerge kelsek, bul álemde keńinen qoldanylyp otyr. Shyn máninde, onyń erekshe jańalyǵy joq. Aty ǵana ózgergenimen, mazmuny burynnan bar baqylaý jumystaryna uqsaidy. Mysaly, esse formatyndaǵy tapsyrmalar, diktant nemese basqa da baqylaý jumystary formatynda ótkiziledi», - dep qorytyndylady depýtat.
Depýtattyń pikirinshe, bul máselemen tiisti salalyq qurylymdar kásibi turǵyda ainalysýy kerek.
