كۇنى كەشە، 26 ناۋرىزدا ماجىلىستە مىندەتتى الەۋمەتتىك مەديسينالىق ساقتاندىرۋ تۋرالى زاڭ جوباسى تانىستىرىلدى. جيىنعا كوميتەت ءتوراعاسى اسحات ايماعامبەتوۆ جەتەكشىلىك ەتىپ، ءماجىلىس ۆيسە-سپيكەرى دانيا ەسپايەۆا قاتىسقان ەدى. وسى جيىننان كەيىن دەپۋتات الەۋمەتتىك جەلىدە اتالعان جۇيەدەگى شيكىلىك جايىندا اشىپ ايتىپ، ماسەلە كوتەردى، دەپ حابارلايدى Dalanews.kz.
ءماجىلىس دەپۋتاتىنىڭ ايتۋىنشا، ءمامس جۇيەسىندە ءاربىر ازامات اي سايىن جالاقىسىنان 2% جارنا تولەيدى. جۇمىس بەرۋشى دە ءار قىزمەتكەرى ءۇشىن قوسىمشا 3% اۋدارادى. بۇل جاعىنان ەشقانداي كىلتيپان جوق.
ەندى، وسىدان بولەك، 15 ساناتتاعى ازاماتتار بار: زەينەتكەرلەر، بالالار، ستۋدەنتتەر جانە تاعى باسقالار. ولار ءۇشىن جارنانى مەملەكەت تولەۋى ءتيىس. زاڭ بويىنشا — ورتاشا جالاقىنىڭ 2%-ى كولەمىندە. ال ءىس جۇزىندە نە بولىپ جاتىر؟
"ماسەلەن، ازاماتتار مەن جۇمىس بەرۋشىلەر جارنانى ۋاقتىلى تولەيدى. تولەمەسە — بىردەن جۇيەدەن شىعارىلادى، مەديسينالىق كومەك توقتايدى. ال مەملەكەت شە؟ قارجى مينيسترلىگى جارنانى ورتاشا ەمەس، مەدياندىق جالاقىدان ەسەپتەيدى. بۇل — زاڭ بۇزۋشىلىق. سوندا ورتا ەسەپپەن جۇيە جىل سايىن 250 ملرد تەڭگە جوعالتادى. 2024 جىلى، ءتىپتى وسى ازايتىلعان جارنانىڭ جارتىسى عانا تولەنگەن. سونىڭ سالدارىنان دەنساۋلىق ساقتاۋ جۇيەسى 2024 جىلى 500 ملرد تەڭگەدەن استام قاراجاتتان قاعىلدى"، - دەيدى اسحات ايماعامبەتوۆ.
دەپۋتات بۇل جاي عانا سان دەپ، ونى ەلەۋسىز قالدىرۋعا بولمايتىنىن ايتادى.
"ويتكەنى وسى قاراجاتتىڭ تۇسپەۋىنە بايلانىستى، بىرىنشىدەن، ەمحانالارداعى ۇزىن-سونار كەزەكتەر،ەكىنشىدەن، قولجەتىمسىز اناليزدەر مەن دارى-دارمەك،ۇشىنشىدەن، ۋاقىتىندا كومەك الا الماعان مىڭداعان ادامنىڭ ماسەلەسى تۋىنداۋدا"، - دەگەن ول "ازامات تولەمەسە — جۇيەدەن شىعارىلادى. ال مەملەكەت تولەمەسە — ەشتەڭە بولمايدى. ەشكىم جاۋاپ بەرمەيدى. سوندا بۇل قالاي بولعانى؟ زاڭ بارىنە ورتاق بولۋى كەرەك ەمەس پە" دەپ كۇيەنەدى.
