Kúni keshe, 26 naýryzda Májiliste mindetti áleýmettik meditsinalyq saqtandyrý týraly zań jobasy tanystyryldy. Jiynǵa komitet tóraǵasy Ashat Aimaǵambetov jetekshilik etip, Májilis vitse-spikeri Daniia Espaeva qatysqan edi. Osy jiynnan keiin depýtat áleýmettik jelide atalǵan júiedegi shikilik jaiynda ashyp aityp, másele kóterdi, dep habarlaidy Dalanews.kz.
Májilis depýtatynyń aitýynsha, MÁMS júiesinde árbir azamat ai saiyn jalaqysynan 2% jarna tóleidi. Jumys berýshi de ár qyzmetkeri úshin qosymsha 3% aýdarady. Bul jaǵynan eshqandai kiltipan joq.
Endi, osydan bólek, 15 sanattaǵy azamattar bar: zeinetkerler, balalar, stýdentter jáne taǵy basqalar. Olar úshin jarnany memleket tóleýi tiis. Zań boiynsha — ortasha jalaqynyń 2%-y kóleminde. Al is júzinde ne bolyp jatyr?
"Máselen, azamattar men jumys berýshiler jarnany ýaqtyly tóleidi. Tólemese — birden júieden shyǵarylady, meditsinalyq kómek toqtaidy. Al memleket she? Qarjy ministrligi jarnany ortasha emes, mediandyq jalaqydan esepteidi. Bul — zań buzýshylyq. Sonda orta eseppen júie jyl saiyn 250 mlrd teńge joǵaltady. 2024 jyly, tipti osy azaitylǵan jarnanyń jartysy ǵana tólengen. Sonyń saldarynan densaýlyq saqtaý júiesi 2024 jyly 500 mlrd teńgeden astam qarajattan qaǵyldy", - deidi Ashat Aimaǵambetov.
Depýtat bul jai ǵana san dep, ony eleýsiz qaldyrýǵa bolmaitynyn aitady.
"Óitkeni osy qarajattyń túspeýine bailanysty, birinshiden, emhanalardaǵy uzyn-sonar kezekter,ekinshiden, qoljetimsiz analizder men dári-dármek,úshinshiden, ýaqytynda kómek ala almaǵan myńdaǵan adamnyń máselesi týyndaýda", - degen ol "azamat tólemese — júieden shyǵarylady. Al memleket tólemese — eshteńe bolmaidy. Eshkim jaýap bermeidi. Sonda bul qalai bolǵany? Zań bárine ortaq bolýy kerek emes pe" dep kúienedi.
