قۇجاتقا قازاقستان تاراپىنان «قازعارىش» ءتوراعاسى تالعات مۇسابايەۆ پەن رەسەيدىڭ فەدەرالدىق عارىش اگەنتتىگى باسشىسىنىڭ ۋاقىتشا مىندەتىن اتقارۋشى ا.ن. يۆانوۆ قول قويعان. كەلىسىمشارتتا قازاق عارىشكەرى ا. ايىمبەتوۆتىڭ عارىشقا ۇشۋ دايىندىعى مەن ونى جۇزەگە اسىرۋ جانە عارىشكەردى ۇشىپ كەلگەن سوڭ وڭالتۋ جونىندەگى قىزمەتتەردى كورسەتۋ مەن جۇمىستاردى ورىنداۋ بارىسى قاراستىرىلعان.
ءبىزدى كەلىسىمشارتتىڭ قۇنى قىزىقتىردى. «قازعارىشتىڭ تاراتقان مالىمەتىنشە ونىڭ قۇنى 1،1 ملرد. ءرۋبلدى قۇرايدى ەكەن. بۇل ميلليونداعان دوللار ەكەنىن ءىشىڭىز سەزىپ وتىرعان شىعار. ءوز كەزەگىندە تالعات مۇسابايەۆ:
– بۇل وتە ماڭىزدى قۇجات، وندا عارىشتىق ۇشىرىلىمنىڭ بارلىق قىر-سىرى قاراستىرىلعان. نەگىزگى بولىمنەن باسقا، ونىڭ تاعى 11 قوسىمشاسى بار. مەن قازاقستاندىق جانە رەسەيلىك ماماندارعا ريزامىن. ولار قىسقا مەرزىمدە، ياعني 2 جارىم ايدىڭ ىشىندە كەلىسىمشارتتى دايىنداپ شىقتى. شىن مانىندە، وسى باعىتتا وراسان زور جۇمىستار جۇرگىزىلدى، – دەدى. وسىلايشا تاكەڭ ءبىر ادامدى عارىشقا اتتاندىرىپ (ويلاماعان جەردەن)، «قازعارىش» مەكەمەسى قىرۋار جۇمىس تىندىرعانداي كەيىپ تانىتتى. گازەتىمىزدىڭ وتكەن سانىندا داعدارىس القىمنان العان تۇستا ا.ايىمبەتوۆتىڭ قىرۋار اقشا جۇمساپ، عارىشقا ۇشۋى ورىنسىز ەكەنىن ايتقان ەدىك. امال نە امبيسياسى الاتاۋداي عارىشكەرلەرىمىز العان بەتتەرىنەن قايتقان جوق. بۇل ۇشىرىلىمنان قازاقستان ەكونوميكاسى مەن عىلىمىنا قانداي پايدا بولاتىن ماسەلە باسى اشىق كۇيىندە قالدى.
"قمد" اقپارات.
