بۇل تۋرالى ەۋرازيا ءبىرىنشى ارناسى حابارلايدى.
- ايالا نە تاماق ىستەپ جاتىرسىڭ؟ بىلمەي جاتىرسىڭ با؟
- تورت.
- تورتتى قالاي ىستەيدى؟
ايالاعا ءتاتتى تورتتى دايىنداپ بەرەتىن ازىرگە اناسى جوق ۇيدە. سوندىقتان، سۇيىكتى اسىن ءبۇلدىرشىننىڭ ءوزى ازىرلەۋگە تۋرا كەلەدى. ويىنشىقتارىن رەتتەپ، ويشا ءتاتتى قيالعا بەرىلىپ وتىر.
ءحانادىل جۇمابايەۆتىڭ كۇندەلىكتى تىرلىگى وسى. بالالارى ءۇشىن قارا قازاننىڭ دا بابىن ۇيرەنىپ العان. كۇنىنە ەكى مەزگىل اس-اۋقات ازىرلەپ، ىستىق تاماق پىسىرەدى. اكەلەرىنىڭ ءاربىر تاعامى قارا دومالاقتارىنا ۇنايدى.
ءحانادىل جۇمابايەۆ، وراز اتا اۋىلىنىڭ تۇرعىنى:
ەندى تاعدىر عوي. باسقا تۇسكەن سوڭ تاماق ىستەۋدى ۇيرەندىك. تەك جۇمىرتقا قۋىرۋدى عانا بىلەتىنمىن. ءقازىر پالاۋ، ءبارىن ىستەپ جاتىرمىن.
وتاعاسى سوڭعى ەكى جىلدان بەرى جالعىز ءوزى بالالارىنا باس-كوز بولىپ ءجۇر. جۇبايى وتباسىنان كەتىپ قالعان ەكەن. الىسقا ەمەس، كورشى اۋىلدا تۇرادى. اندا-ساندا پەرزەنتتەرىنەن حابار العانى بولماسا، ۇيگە كەلمەيدى ەكەن. وعان بالالارى دا ۇيرەنىپ قالعان. اناسىنان گورى، اكەلەرى جاقىن.
مەيرامبەك پەرنەحان، مەكتەپ وقۋشىسى:
اكەمە ءۇي جۇمىستارىنا كومەكتەسەم. بوس ۋاقىتىمدا ءۇي جينايمىن. ساباق ورىندايمىن. ىنىمە شىعارا الماي جاتقان ەسەبى، جازۋىنا كومەكتەسەمىن.
مەيرامبەك اۋىلداعى مەكتەپتە 7ء-شى سىنىپتا وقيدى. ساباق ۇلگەرىمى جاقسى. وقۋ وزاتى بولعاندىقتان، باۋىرلارىنا قارايلاسادى. ءۇي تاپسىرماسىن قاداعالايدى. كەيدە وعان اكەسى دە قوسىلادى. ايتەۋىر، ەكى جاقتاپ ءجۇرىپ، ءمۇعالىمنىڭ ۇيگە بەرگەن تاپسىرماسىن ورىنداپ ۇلگەرەدى.
ءحانادىل جۇبايى جايىندا سىر اشىپ ەشتەمە ايتقىسى كەلمەيدى. نە سەبەپتى اجىراسقانىن دا ايتپادى. اۋىل اقساقالدارى كەزىندە تاتۋلاستىرماق تا بولىپتى ەكەۋىن. ءبىراق، ورتاق كەلىسىمگە كەلە الماپتى.
ءحانادىل جۇمابايەۆ، وراز اتا اۋىلىنىڭ تۇرعىنى:
ەندى تاعدىر عوي. باسقا ءتۇستى. باسىمەن كوتەرەسىڭ ەندى. كونەم عوي، تىرشىلىك قوي.
دەگەنمەن، ەندى ءقايتتىم دەپ وتىرعان وتاعاسى جوق. "بەرەكە باسى - بىرلىكتە" ەكەنىن جاقسى بىلەتىن ول بيىل قاڭتاردا اتاۋلى الەۋمەتتىك كومەك الۋعا ءوتىنىش ءبىلدىرىپتى. سۇرانىسى قاناعاتتاندىرىلىپ، ءار توقسان سايىن 300 مىڭ تەڭگەگە جۋىق جاردەماقى الادى ەكەن. اۋدان اكىمدىگى جۇمىسقا ورنالاستىرىپ بەرگەن. جانە ۇكىمەتتەن 864 مىڭ تەڭگە الۋعا جاردەمدەسىپتى. اقشاسىنا ەسىك الدىنا جىلىجاي سالىپ، قىزاناق، قيار وسىرۋمەن اينالىسادى. تاپقان تابىسىن بالالارىنا جۇمسايدى.
ءحانادىل جۇمابايەۆ، وراز اتا اۋىلىنىڭ تۇرعىنى:
تابىس قوي ەندى. بالالارعا ايتەۋىر، ارى قاراي وزدەرىن ەپتەپ كەتەر. ۇيرەنگەننىڭ ەش ايىبى جوق. تىرشىلىك ەستەپ، وزدەرىنىڭ كۇنىن كورەتىن ارەكەت ىستەپ جاتىر.
تاعدىر تاۋقىمەتىنە مويىماعان وتاعاسى بالالارىنا اكەلىك قامقورلىقپەن قوسا انالىق مەيرىمدى دە قاتار سىيلاۋعا بارىن سالىپ كەلەدى.
ءحانادىل جۇمابايەۆ، وراز اتا اۋىلىنىڭ تۇرعىنى:
پاپا، پاپا دەپ ايتەۋىر، ءىش باۋىرىما كىرىپ جۇرگەن وسىلاردىڭ بارىنا شۇكىر. بالا- شاعام قولعانات بولىپ، مەن ىستەيتىندى ولار ىستەپ قويادى. تاماقتى جىلىتادى. كۇنىمىزدى كورىپ جاتىرمىز. جاقسى.
وتاعاسىنىڭ بار ارمانى – جاقسى تاربيە بەرىپ، ۇلىن ۇياعا، قىزىن قياعا قوندىرۋ. بۇل شارۋا ءبىر وزىنە وڭايعا سوقپاسىن بىدەدى. سوندىقتان جۇبايى قايتا ورالاتىن بولسا، پەرزەنتتەرى ءۇشىن جاڭا ءومىر باستاۋعا دايىنمىن دەپ وتىر.
https://youtu.be/OFIpJBINwSA
