ەكونوميست ەرقانات ابەني قازاقستان ەكونوميكاسىنىڭ بولاشاعىنا قاتىستى بولجامىن ايتتى، - دەپ حابارلايدى Dalanews.kz.
ونىڭ سوزىنشە، قازاقستان ەكونوميكاسى الداعى تاڭدا مىقتى بولمايدى. وعان بىرنەشە سەبەپ بار.
"امەريكا قۇراما شتاتتارىندا كاسىپكەردىڭ تابىسى 65 مىڭ دوللاردان از بولسا، ول سالىقتان بوساتىلادى. تەك 800 دوللار كولەمىندە رەنتا تولەيدى. ءار شتاتتا ءارتۇرلى، سالاعا دا بايلانىستى، ءبىراق ماقساتى ءبىر: مەملەكەت كاسىپكەر "اياعىنا تۇرىپ العانعا دەيىن" سالىقتى ءۇيىپ قويمايدى"، - دەيدى ول.
ياعني اقش-تا شاعىن بيزنەستى سالىق سالىناتىن بازا رەتىندە قاراستىرمايدى.
"ونىڭ ۇستىنە شاعىن بيزنەستىڭ جالپى قازىناداعى ۇلەسى ايتارلىقتاي كوپ ەمەس. سالىق ورگاندارىنىڭ اقشاسى مەن رەسۋرستارى سالىقتىق اكىمشىلەندىرۋگە ولاردان تۇسەتىن قارجىدان كوبىرەك جۇمسالادى. ياعني ونىڭ الەۋمەتتىك ماڭىزى بار جۇمىس ورىندارى قۇرىلىپ، حالىق جۇمىسپەن قامتىلادى. ناتيجەسىندە مەملەكەت "پليۋستە" قالادى"، - دەيدى ول.
وسىلايشا ەلدە بيزنەس ورتا قالىپتاسادى. ەكونوميست كاسىپكەردىڭ تابىسى كوبەيىپ، ول سالىق تولەۋدەن جالتارسا، جازالاناتىنىن اتاپ ءوتتى.
"وسىلاي بىرتىندەپ شاعىن جانە ءىرى بيزنەس دامي باستايدى. ولار بىرىگىپ، كۇشەيگەن ساتتە بيزنەس باستاماسى باستالادى، كىشكەنتاي ءدامحانا ۇلكەن مەيرامحاناعا، كىشكەنتاي دۇڭگىرشەكتەر ۇلكەن بۋتيككە اينالادى. سول ساتتە سالىق تا كوبىرەك تۇسەدى. وسىلايشا جۇمىس ورنى دا كوبەيەدى"، - دەيدى مامان.
بيلىكتىڭ ارمانى دا سول – ورتا كلاسس پەن سەنىمدى كاسىپكەرلەردى قالىپتاستىرۋ ەكەن.
"بۇل - وركەندەيتىن ەكونوميكانىڭ نەگىزى. ال بىزدە ەندى دامىپ كەلە جاتقان كاسىپتى "ەركەتەلۋدىڭ" ورنىنا سالىق تولەتىپ، ول اقشانى شاعىن جانە ورتا بيزنەستى قولداۋعا ارنالعان ءتيىمسىز مەملەكەتتىك باعدارلامالارعا جۇمساپ جاتادى. ول باعدارلامالار ناتيجەسىز بولعانىمەن قويماي، كاسىبىن باستاعىسى كەلگەن ادامنىڭ اياعىن شالىپ، ءولى بيزنەستىڭ پايدا بولۋىنا الىپ كەلەدى. مۇنداي باعدارلامالاردىڭ ماقساتى - تابىسى مول كاسىپتىڭ پايدا بولۋىنا اسەر ەتپەي، سۋبسيديانى ءبولىپ الۋ"،- دەپ سىنادى ول.
ودان بولەك، ەكونوميست ءقازىر مەملەكەت ءتىپتى تاپسىرىس جەتكىزۋشىلەرگە، ۇساق ساتۋشىلارعا سالىق تولەتىپ قويعانىن ايتادى.
"ولار ءوزىن، وتباسىن اسىراۋ ءۇشىن اۋىر جۇمىس ىستەپ، قانشا تابىس تابا قويار دەيسىز؟ ولار بيۋدجەتتىڭ كىرىس بولىگىن تولىقتىرۋ ءۇشىن وسى جاڭا نارسەنىڭ بارىنە ءالى پايدا بولىپ ۇلگەرمەگەن بيزنەسمەندەردەن الاتىن اقشادان كوبىرەك اقشا جۇمسايتىن شىعار"، - دەيدى ەكونوميست.
