"اۋىل - ەل بەسىگى" جانە "قالا ماڭىنداعى ەلدىمەكەندەردى دامىتۋ" مەملەكەتتىك باعدارلامالارىن جابۋ جوسپارلانىپ وتىر. بۇل تۋرالى ۇلتتىق ەكونوميكا ءمينيسترى سەرىك جۇمانعارين بۇگىن ماجىلىستەگى ۇكىمەت ساعاتى بارىسىندا ايتتى، دەپ حابارلايدى Dalanews.kz.
ول ءوز بايانداماسىندا الداعى ءۇش جىلعا ارنالعان ترانسفەرتتەردى قالىپتاستىرۋدىڭ نەگىزگى قاعيداتتارىنا توقتالدى. ونىڭ ايتۋىنشا، بۇل اراداعى نەگىزگى مىندەت - وڭىرلەردىڭ بيۋدجەتپەن تەڭدەي قامتۋ ماقساتىندا تەڭگەرىم جۇرگىزۋ، بازالىق ينفراقۇرىلىمعا تەڭ قولجەتىمدىلىكتى قامتاماسىز ەتۋ جانە الشاقتىقتىڭ الدىن الۋ.
"ءبىز "اۋىل - ەل بەسىگى" جانە "قالا ماڭىنداعى ەلدىمەكەندەردى دامىتۋ"، شاعىن جانە مونوقالالاردا بيۋدجەت ەسەبىنەن ينۆەستيسيالىق جوبالاردى ىسكە اسىرۋ سياقتى ءتۇرلى باعدارلامالار شەڭبەرىندە ءىس-شارالاردى جەكەلەي قارجىلاندىرۋ تاسىلىنەن اياعىمىزدى تارتامىز. ءبىز بۇل باعدارلامالاردى جويامىز. رەسپۋبليكالىق بيۋدجەتتەن جالپىۇلتتىق ماڭىزى بار وبەكتىلەر مەن سىني ينفراقۇرىلىمدار قارجىلاندىرىلاتىن بولادى"،-دەدى پرەمەر – ءمينيستردىڭ ورىنباسارى-ۇلتتىق ەكونوميكا ءمينيسترى.
ول مۇنىڭ جوعارى الەۋمەتتىك-ەكونوميكالىق ناتيجە بەرەتىن قىمبات جوبالار بولاتىنىن جەتكىزدى. ال حالىقتىڭ تىرشىلىگىن قامتاماسىز ەتۋ ءۇشىن ءبىرىنشى قاجەتتىلىكتەگى وبەكتىلەر جەرگىلىكتى بيۋدجەتتەن قارجىلاندىرىلاتىن بولادى.
"سوڭعى جىلدارى جەرگىلىكتى دەڭگەيدە سالىقتاردىڭ جوعارى قارقىنمەن جينالۋى وسى تاسىلدەردى ىسكە اسىرۋعا، رەسپۋبليكالىق بيۋدجەتكە تۇسەتىن سالماقتى ازايتۋعا مۇمكىندىك بەرۋدە. سونىمەن قاتار، جەرگىلىكتى بيۋدجەتتەرگە قوسىمشا فۋنكسيالاردى، نىسانالى ترانسفەرتتەردى بەرىلەتىنىن ەسكەرسەك، بۇل رەتتە ۇلكەن ۇنەم جاساۋ مۇمكىن ەكەنىن تۇسىنەمىز"، - دەپ ءسوزىن تولىقتىردى جۇمانعارين.
ول ۇكىمەت پەن جەرگىلىكتى اتقارۋشى ورگانداردىڭ الدىندا جەرگىلىكتى بيۋدجەتتەردىڭ پارامەترلەرىن ساپالى باعامداپ، بولجاۋ مىندەتى تۇرعانىن دا باسا ايتتى.
"اۋىل – ەل بەسىگى" باعدارلاماسى 2019 جىلى قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ باستاماسىمەن ىسكە قوسىلعان. ول اۋىلدىق جەرلەردە ينفراقۇرىلىمداردى دامىتۋعا باعىتتالعان. وڭىرلەردى دامىتۋ جونىندەگى مەملەكەتتىك باعدارلاما 2014 جىلى قابىلداندى.
