"Aýyl - el besigi" jáne "Qala mańyndaǵy eldimekenderdi damytý" memlekettik baǵdarlamalaryn jabý josparlanyp otyr. Bul týraly Ulttyq ekonomika ministri Serik Jumanǵarin búgin Májilistegi Úkimet saǵaty barysynda aitty, dep habarlaidy Dalanews.kz.
Ol óz baiandamasynda aldaǵy úsh jylǵa arnalǵan transfertterdi qalyptastyrýdyń negizgi qaǵidattaryna toqtaldy. Onyń aitýynsha, bul aradaǵy negizgi mindet - óńirlerdiń biýdjetpen teńdei qamtý maqsatynda teńgerim júrgizý, bazalyq infraqurylymǵa teń qoljetimdilikti qamtamasyz etý jáne alshaqtyqtyń aldyn alý.
"Biz "Aýyl - el besigi" jáne "Qala mańyndaǵy eldimekenderdi damytý", shaǵyn jáne monoqalalarda biýdjet esebinen investitsiialyq jobalardy iske asyrý siiaqty túrli baǵdarlamalar sheńberinde is-sharalardy jekelei qarjylandyrý tásilinen aiaǵymyzdy tartamyz. Biz bul baǵdarlamalardy joiamyz. Respýblikalyq biýdjetten jalpyulttyq mańyzy bar obektiler men syni infraqurylymdar qarjylandyrylatyn bolady",-dedi Premer – ministrdiń orynbasary-Ulttyq ekonomika ministri.
Ol munyń joǵary áleýmettik-ekonomikalyq nátije beretin qymbat jobalar bolatynyn jetkizdi. Al halyqtyń tirshiligin qamtamasyz etý úshin birinshi qajettiliktegi obektiler jergilikti biýdjetten qarjylandyrylatyn bolady.
"Sońǵy jyldary jergilikti deńgeide salyqtardyń joǵary qarqynmen jinalýy osy tásilderdi iske asyrýǵa, respýblikalyq biýdjetke túsetin salmaqty azaitýǵa múmkindik berýde. Sonymen qatar, jergilikti biýdjetterge qosymsha fýnktsiialardy, nysanaly transfertterdi beriletinin eskersek, bul rette úlken únem jasaý múmkin ekenin túsinemiz", - dep sózin tolyqtyrdy Jumanǵarin.
Ol Úkimet pen jergilikti atqarýshy organdardyń aldynda jergilikti biýdjetterdiń parametrlerin sapaly baǵamdap, boljaý mindeti turǵanyn da basa aitty.
"Aýyl – el besigi" baǵdarlamasy 2019 jyly Qazaqstannyń Tuńǵysh prezidenti Nursultan Nazarbaevtyń bastamasymen iske qosylǵan. Ol aýyldyq jerlerde infraqurylymdardy damytýǵa baǵyttalǵan. Óńirlerdi damytý jónindegi memlekettik baǵdarlama 2014 jyly qabyldandy.
