استانا قالاسىنداعى ءالىمحان ەرمەكوۆ اتىنداعى №38 مەكتەپ-ليسەيىنىڭ جازعى ەتنولاگەرىندە ەرەكشە ەكولوگيالىق جوبا تانىستىرىلدى. وقۋشىلاردىڭ تابيعاتتى قورعاۋعا باعىتتالعان تىڭ يدەياسى – «ەكو-فونتان» جوباسى كوپشىلىكتىڭ قىزىعۋشىلىعىن تۋدىردى،- دەپ حابارلايدى Dalanews.kz
جوبا مەكتەپتەگى STEAM باعىتى مەن ەكولوگيالىق تاربيەنىڭ ۇشتاسقان ناقتى ۇلگىسى بولا ءبىلدى.
«ەكو-فونتان» – كۇن ەنەرگياسىمەن جۇمىس ىستەيتىن، سۋدى قايتا اينالىمعا جىبەرەتىن يننوۆاسيالىق جۇيە. فونتان تابيعي رەسۋرستاردى ۇنەمدەپ قانا قويماي، قالالىق ورتاعا ەكولوگيالىق جانە ەستەتيكالىق قۇندىلىق قوسادى. جوبانىڭ نەگىزگى ماقساتى – سۋدى جانە ەنەرگيانى ءتيىمدى پايدالانۋ ارقىلى قورشاعان ورتانى قورعاۋ.
فونتاننىڭ قۇرىلىمىنا كەلسەك، كۇن پانەلدەرى ارقىلى قۋات الاتىن سورعى جۇيەسى سۋدى قايتا اينالدىرادى. سۋ ىسىراپسىز پايدالانىلىپ، قايتا وڭدەلەدى. جاساندى اعاشتار، ساندىك وسىمدىكتەر مەن تاستار ارقىلى تابيعي كورىنىس قالىپتاسادى.
وقۋشىلار بۇل جوبانىڭ ماڭىزىن ءۇش باعىتپەن نەگىزدەدى: سۋدى ۇنەمدەۋ، ەنەرگيانى ءتيىمدى پايدالانۋ، ەكولوگيالىق مادەنيەتتى قالىپتاستىرۋ.
ەكو-فونتان – تەك تەحنيكالىق جاڭالىق ەمەس، بۇل – تابيعاتپەن ۇيلەسىمدى ءومىر ءسۇرۋدى ناسيحاتتايتىن تاربيە قۇرالى. مەكتەپ اۋلاسىندا، ساياباقتاردا نەمەسە قوعامدىق ورىنداردا قولدانۋعا ىڭعايلى مۇنداي جوبالار ەلوردانىڭ ەكولوگيالىق كەلبەتىن جاقسارتۋعا دا ۇلەس قوسادى.
جوبا اۆتورى انەل كەنجەحاننىڭ ايتۋىنشا، فونتان ارقىلى بالالار ەكولوگيانى تەك تەوريالىق ەمەس، پراكتيكالىق تۇردە مەڭگەرىپ، كۇن ەنەرگياسىنىڭ تيىمدىلىگىن ءوز كوزدەرىمەن كورە الادى.
بۇل باستاما – جاس ۇرپاقتىڭ تابيعاتتى قورعاۋعا دەگەن جاۋاپكەرشىلىگىن ارتتىراتىن ناقتى ارەكەت. وسىنداي جوبالار ارقىلى ەلوردالىق وقۋشىلار قورشاعان ورتانى ساقتاۋعا، جاڭاشىل ويلاۋ قابىلەتتەرىن دامىتۋعا جانە تۇراقتى دامۋعا ءوز ۇلەستەرىن قوسۋدا.
