العاشقى راۋندتان جەكپە-جەك تارتىسقا تولى بولدى. قوس بوكسشى سالعاننان اشىق ايقاسقا شىعىپ، ءبىر-بىرىنىڭ وسال تۇسىن اڭدىپ باقتى. كوپ ساتتە قازاق بوكسشىسى ءدال سوققىلار باعىتتاپ، بەلسەندى كورىندى. كانادالىق بوكسشى دا ۇتىمدى ساتتەردە ءدال سوققىلار جاساپ، ساۋاتتى قورعانا ءبىلدى. الايدا قانات يسلامنىڭ اۋىر سوققىلارىنا توتەپ بەرە الماي، ءۇش ماترە نوۋداۋن الۋعا ءماجبۇر بولدى. كەزدەسۋدىڭ توعىزىنشى راۋندىندا قاناتتىڭ قارىمدى سوققىسى قارسىلاسىنا ءدال ءتيىپ، تورەشىنىڭ ارالاسۋىمەن جەكپە-جەك توقتاتىلدى.
وسىلايشا، قازاق بوكسشىسى سپورتتىق مانسابىندا ەشقاشان جەڭىلىپ كورمەگەن برەندون كۋكتى تەحنيكالىق نوكاۋتپەن جەڭىپ، ءوزىنىڭ 25ء-شى جەڭىسىنە قول جەتكىزدى.
قانات يسلام ءۇشىن بۇل كەزدەسۋدىڭ ماڭىزى جوعارى ەدى. ونىڭ وسى كەزدەسۋدەن كەيىن رەيتينگى جوعارىلاپ، ءوز سالماعى بويىنشا العاشقى وندىققا ەندى. استاناداعى بوكس كەشىنە ەلىمىزدىڭ تۇكپىر-تۇكپىرىنەن اعىلعان جۇرتتىڭ قاراسى مول. «سارىارقا» ۆەلوترەگىندە وتكەن كەشكە سپورت سۇيەر قاۋىمنان بولەك، ەلىمىزگە تانىمال تۇلعالار، ءار سالانىڭ ماماندارى، ساياسي ەليتا وكىلدەرى قاتىستى.
بوكس كەشى باستالماي تۇرىپ ءارتۇرلى بولجام ايتىلعان بولاتىن. بۇعان دەيىن 18 كەزدەسۋ وتكىزىپ، بىردە ءبىر رەت جەڭىلىس تاپپاعان ب. كۋكتى قانات يسلامنىڭ جەڭۋى نەعايبىل دەگەن دە ءسوز شىققانى راس. ءبىراق قانات يسلام ءوزىن رينگ قوجايىنى رەتىندە وتە ساۋاتتى ۇستادى ءارى باتىل مىنەز تانىتتى. ونىڭ ءاربىر سوققىسى تيگەن سايىن جيىلعان جۇرتشىلىق «قانات» دەپ ايعايلادى. قانات كوپشىلىكتىڭ كوڭىلىنەن شىقتى. ول ءار راۋند سايىن مىعىم سوققىلارىن ءدال جۇمساۋمەن بولدى. بوكس ماماندارىنىڭ ايتۋىنشا، قاناتتىڭ كەزدەسۋدى بۇدان دا ەرتە اياقتاۋعا مۇمكىندىگى بولدى. دالىرەك ايتساق، العاشقى نوكداۋن كەزىندە. ال جۇرتشىلىق ءۇشىن كەزدەسۋدىڭ 9 راۋندقا سوزىلعانى ۇناعانى شىن.
ايتا كەتسەك، بۇعان دەيىن العاشقى جەكپە-جەكتە قازاقستاندىق بوكسشى مەيىرىم نۇرسۇلتانوۆ ءبىر مينۋتتىڭ ىشىندە ءوز قارسىلاسىن نوكاۋتپەن جەڭگەن بولاتىن.
ەكىنشى كەزدەسۋدە ديماش نيازوۆ برازيليالىق ەدۋاردو پەرەيرانى ۇپاي سانىمەن جەڭدى.
ءۇشىنشى جەكپە-جەكتە ايدوس ەربوسىن ۇلى ارگەنتينالىق دجوناتان بارباديلونى نوكاۋتپەن جەڭدى.
ءتورتىنشى كەزدەسۋدە ءالي احمەتوۆ امەريكالىق توماس ءدجاستيندى تەxنيكالىق نوكاۋتپەن جەڭدى.
ودان كەيىنگى كەزدەسۋدە نۇرسۇلتان جاڭابايەۆ برازيليالىق الەكس دۋارتەنى دە نوكاۋتپەن جەڭدى.
التىنشى جەكپە-جەكتە رۋسلان مىرساتايەۆ ارگەنتينالىق اندرەاس ماتياس ءافرانليدى ايقىن ۇتتى.
جەتىنشى جەكپە-جەكتە جانىبەك ءالىمحان ۇلى برازيليالىق جيلبەرتو پەرەيرۋ دوس سانتوستى ۇپاي سانىمەن جەڭدى.
ال جانقوش تۇراروۆ ارگەنتينالىق برۋنو لەوناردو رومەيدى ۇپاي سانىمەن جەڭدى.
جانقوش تۇراروۆ وسىمەن 22 كەزدەسۋ وتكىزىپ، سونىڭ بارىندە باسىم ءتۇستى. ماماندار جانقوش الار اسۋ ءالى الدا دەگەن بولجام ايتىپ وتىر. ونىڭ كەزدەسۋلەرىنە امەريكالىق تەلەارنالار ءقازىردىڭ وزىندە قىزىعۋشىلىق تانىتىپ وتىرعاندىعى بەلگىلى بولدى.
جانىبەك ءالىمحان ۇلى 40 جاستاعى قارسىلاسىن 6 راۋندتىق باسەكەدە ۇپاي سانىمەن جەڭدى. جۇرتتىڭ ودان نوكاۋت كۇتكەنى انىق. الايدا قانشاما سوققى جاساعانىنا قاراماستان، تاجىريبەلى قارسىلاسى اۋىر سوققىلارىنىڭ كوبىن دارىتپادى. جانىبەكتىڭ كاسىپقوي بوكستاعى ءداۋىرى ەندى باستالدى. شويىن جۇدىرىق يەسى ءالى جاس. ونىڭ ونەرىنە ءتانتى جۇرتشىلىق قازاق بوكسىنىڭ بولاشاعى دەپ بىلەدى. گەنناديي مەن قانات العان اسۋدى وسى ءالىمحان ۇلى باعىندىرادى دەۋشىلەر كوپ.
امالبەك تشانوۆ، ارداگەر سپورتشى، قوعام قايراتكەرى:
– مەن قانات يسلامنىڭ ءار بوكسىن قالدىرماي كورىپ ءجۇرمىن. قانات – قازاقتىڭ باتىرى. ونىڭ تۇلا بويى تۇنعان رۋح. قاناتتىڭ بوكسىن كورگەن ساتتە كوز الدىڭا قازاقتىڭ بۇرىنعى باتىرلارى ەلەستەيدى. ول ءوزى ءۇشىن ەمەس، ەلى، وتانى ءۇشىن سايىس الاڭىنا شىعاتىنداي. وسى جولعى كەزدەسۋى ارقىلى ءوزىنىڭ ناعىز مايتالمان ەكەنىن تاعى دالەلدەدى. كۋك تە وڭاي بوكسشى ەمەس. العاشقى ەكى نوكداۋننەن كەيىن ەسىن تەز جيدى. ءتىپتى بىرنەشە مارتە قاناتتىڭ وزىنە اۋىر سوققىلار جۇمساي ءبىلدى.
ءبىز قاناتتىڭ الداعى جەڭىستەرىنىڭ تەزىرەك بولۋىن قالايمىز. قانات ءدال ءقازىر جاراۋ اتتاي. ونى كىمگە بولسا دا، سالۋعا بولادى. پروموۋتەرلەرى بىلىكتى جۇمىس جاساسا، رەيتينگى وزىنەن جوعارى بوكسشىلارمەن كەزىكسە دەپ ويلايمىز.
ەرماحان ىبىرايىموۆ، بوكسەر، وليمپيادا چەمپيونى:
– بۇل جولعى بوكس كەشى ەلدىڭ قۋانىشىن ارتتىردى. ەكسپو اياسىندا استانا تورىندە ەرەكشە كەزدەسۋ ءوتتى. بۇل ەلىمىزدىڭ بەدەلىنىڭ ارقاسى. مەن بارلىق بوكسشىمىزدىڭ جەڭىستەرىنە ءتانتىمىن. جانقوشتىڭ قارسىلاسى مىقتى ەكەن. ونى باۋىرىمىز ءوزىنىڭ جىلدامدىعىمەن، ءدال سوققى جۇمساي الۋىمەن جەڭدى.
قانات ءقازىر كىممەن بولسا دا، شىعۋعا دايىن ەكەنىن كورسەتتى. ونىڭ ءار سوقىسى ءدال ءتيىپ جاتتى. قانات – ءبىزدىڭ ماقتانىشىمىز. قاناتپەن كۇللى قازاق ماقتانۋعا ءتيىس. ونى الداعى ۋاقىتتا بۇدان دا دەڭگەيى جوعارى بوكسشىلار كۇتىپ تۇر. وسى باستان جاقسى دايىندالۋى كەرەك. مەن قانات يسلامنىڭ الەم چەمپيونى بولاتىن كۇنى تاياپ كەلەدى دەپ ويلايمىن.
باقتيار ارتايەۆ، وليمپيادا چەمپيونى:
– قۋانىشىمىزدا شەك جوق. استانا قالاسىندا ايتۋلى بوكس كەشى ءوتتى. جىگىتتەردىڭ ءبارى ەرلەدى. ەكسپو اياسىندا وسىنداي كەش ۇيىمداستىرۋ ءۇشىن مينيسترلىك، استانا اكىمدىگى جانە باسقا دا قۇزىرەتتى ورىندار كوپ تەر توككەنى انىق. بۇل كەزدەسۋدى الەمنىڭ 134 ەلى تىكەلەي ەفير ارقىلى كوردى. دەمەك، استانامىزداعى كەشتىڭ اۋقىمى زور بولدى.
مەن قاناتتىڭ جەڭەرىنە سەنىمدى بولدىم. قانات يسلام جاتپاي-تۇرماي دايىندالدى. قانات ءقازىر ناعىز بابىندا ءجۇر. وعان ۋاقىت ۇتتىرماي، وزىنەن رەيتينگىسى جوعارى بوكسشىلارمەن كەزدەسۋ كەرەك.
