Alǵashqy raýndtan jekpe-jek tartysqa toly boldy. Qos boksshy salǵannan ashyq aiqasqa shyǵyp, bir-biriniń osal tusyn ańdyp baqty. Kóp sátte qazaq boksshysy dál soqqylar baǵyttap, belsendi kórindi. Kanadalyq boksshy da utymdy sátterde dál soqqylar jasap, saýatty qorǵana bildi. Alaida Qanat Islamnyń aýyr soqqylaryna tótep bere almai, úsh mátre noýdaýn alýǵa májbúr boldy. Kezdesýdiń toǵyzynshy raýndynda Qanattyń qarymdy soqqysy qarsylasyna dál tiip, tóreshiniń aralasýymen jekpe-jek toqtatyldy.
Osylaisha, qazaq boksshysy sporttyq mansabynda eshqashan jeńilip kórmegen Brendon Kýkti tehnikalyq nokaýtpen jeńip, óziniń 25-shi jeńisine qol jetkizdi.
Qanat Islam úshin bul kezdesýdiń mańyzy joǵary edi. Onyń osy kezdesýden keiin reitingi joǵarylap, óz salmaǵy boiynsha alǵashqy ondyqqa endi. Astanadaǵy boks keshine elimizdiń túkpir-túkpirinen aǵylǵan jurttyń qarasy mol. «Saryarqa» velotreginde ótken keshke sport súier qaýymnan bólek, elimizge tanymal tulǵalar, ár salanyń mamandary, saiasi elita ókilderi qatysty.
Boks keshi bastalmai turyp ártúrli boljam aitylǵan bolatyn. Buǵan deiin 18 kezdesý ótkizip, birde bir ret jeńilis tappaǵan B. Kýkty Qanat Islamnyń jeńýi neǵaibyl degen de sóz shyqqany ras. Biraq Qanat Islam ózin ring qojaiyny retinde óte saýatty ustady ári batyl minez tanytty. Onyń árbir soqqysy tigen saiyn jiylǵan jurtshylyq «Qanat» dep aiǵailady. Qanat kópshiliktiń kóńilinen shyqty. Ol ár raýnd saiyn myǵym soqqylaryn dál jumsaýmen boldy. Boks mamandarynyń aitýynsha, Qanattyń kezdesýdi budan da erte aiaqtaýǵa múmkindigi boldy. Dálirek aitsaq, alǵashqy nokdaýn kezinde. Al jurtshylyq úshin kezdesýdiń 9 raýndqa sozylǵany unaǵany shyn.
Aita ketsek, buǵan deiin alǵashqy jekpe-jekte qazaqstandyq boksshy Meiirim Nursultanov bir minýttyń ishinde óz qarsylasyn nokaýtpen jeńgen bolatyn.
Ekinshi kezdesýde Dimash Niiazov braziliialyq Edýardo Pereirany upai sanymen jeńdi.
Úshinshi jekpe-jekte Aidos Erbosynuly argentinalyq Djonatan Barbadilony nokaýtpen jeńdi.
Tórtinshi kezdesýde Áli Ahmetov amerikalyq Tomas Djastindi texnikalyq nokaýtpen jeńdi.
Odan keiingi kezdesýde Nursultan Jańabaev braziliialyq Aleks Dýarteni de nokaýtpen jeńdi.
Altynshy jekpe-jekte Rýslan Myrsataev argentinalyq Andreas Matias Afranlidi aiqyn utty.
Jetinshi jekpe-jekte Jánibek Álimhanuly braziliialyq Jilberto Pereirý dos Santosty upai sanymen jeńdi.
Al Janqosh Turarov argentinalyq Brýno Leonardo Romeidi upai sanymen jeńdi.
Janqosh Turarov osymen 22 kezdesý ótkizip, sonyń bárinde basym tústi. Mamandar Janqosh alar asý áli alda degen boljam aityp otyr. Onyń kezdesýlerine amerikalyq telearnalar qazirdiń ózinde qyzyǵýshylyq tanytyp otyrǵandyǵy belgili boldy.
Jánibek Álimhanuly 40 jastaǵy qarsylasyn 6 raýndtyq básekede upai sanymen jeńdi. Jurttyń odan nokaýt kútkeni anyq. Alaida qanshama soqqy jasaǵanyna qaramastan, tájiribeli qarsylasy aýyr soqqylarynyń kóbin darytpady. Jánibektiń kásipqoi bokstaǵy dáýiri endi bastaldy. Shoiyn judyryq iesi áli jas. Onyń ónerine tánti jurtshylyq qazaq boksynyń bolashaǵy dep biledi. Gennadii men Qanat alǵan asýdy osy Álimhanuly baǵyndyrady deýshiler kóp.
Amalbek TShANOV, ardager sportshy, qoǵam qairatkeri:
– Men Qanat Islamnyń ár boksyn qaldyrmai kórip júrmin. Qanat – qazaqtyń batyry. Onyń tula boiy tunǵan rýh. Qanattyń boksyn kórgen sátte kóz aldyńa qazaqtyń burynǵy batyrlary elesteidi. Ol ózi úshin emes, eli, otany úshin saiys alańyna shyǵatyndai. Osy jolǵy kezdesýi arqyly óziniń naǵyz maitalman ekenin taǵy dáleldedi. Kýk te ońai boksshy emes. Alǵashqy eki nokdaýnnen keiin esin tez jidy. Tipti birneshe márte Qanattyń ózine aýyr soqqylar jumsai bildi.
Biz Qanattyń aldaǵy jeńisteriniń tezirek bolýyn qalaimyz. Qanat dál qazir jaraý attai. Ony kimge bolsa da, salýǵa bolady. Promoýterleri bilikti jumys jasasa, reitingi ózinen joǵary boksshylarmen kezikse dep oilaimyz.
Ermahan YBYRAIYMOV, bokser, olimpiada chempiony:
– Bul jolǵy boks keshi eldiń qýanyshyn arttyrdy. EKSPO aiasynda Astana tórinde erekshe kezdesý ótti. Bul elimizdiń bedeliniń arqasy. Men barlyq boksshymyzdyń jeńisterine tántimin. Janqoshtyń qarsylasy myqty eken. Ony baýyrymyz óziniń jyldamdyǵymen, dál soqqy jumsai alýymen jeńdi.
Qanat qazir kimmen bolsa da, shyǵýǵa daiyn ekenin kórsetti. Onyń ár soqysy dál tiip jatty. Qanat – bizdiń maqtanyshymyz. Qanatpen kúlli qazaq maqtanýǵa tiis. Ony aldaǵy ýaqytta budan da deńgeii joǵary boksshylar kútip tur. Osy bastan jaqsy daiyndalýy kerek. Men Qanat Islamnyń álem chempiony bolatyn kúni taiap keledi dep oilaimyn.
Baqtiiar ARTAEV, olimpiada chempiony:
– Qýanyshymyzda shek joq. Astana qalasynda aitýly boks keshi ótti. Jigitterdiń bári erledi. EKSPO aiasynda osyndai kesh uiymdastyrý úshin ministrlik, Astana ákimdigi jáne basqa da quziretti oryndar kóp ter tókkeni anyq. Bul kezdesýdi álemniń 134 eli tikelei efir arqyly kórdi. Demek, Astanamyzdaǵy keshtiń aýqymy zor boldy.
Men Qanattyń jeńerine senimdi boldym. Qanat Islam jatpai-turmai daiyndaldy. Qanat qazir naǵyz babynda júr. Oǵan ýaqyt uttyrmai, ózinen reitingisi joǵary boksshylarmen kezdesý kerek.
