جەڭىس كۇنىنىڭ 80 جىلدىعى قارساڭىندا ۇلى وتان سوعىسىنىڭ ارداگەرى ناجىكەن قاپىشيەۆكە ەسكەرتكىش تاقتا ورناتىلدى. سالتاناتتى شارا مايدانگەر تۇرعان ءۇيدىڭ جانىندا ءوتتى،- دەپ حابارلايدى Dalanews.kz

مەموريالدىق تاقتانىڭ اشىلۋ سالتاناتىنا استانا قالاسى اكىمىنىڭ ورىنباسارى ەسەت بايكەن، بايقوڭىر اۋدانىنىڭ اكىمى تالعات راحمانبەردى، ارداگەرلەر كەڭەسىنىڭ، كۇش قۇرىلىمدارىنىڭ وكىلدەرى، ارداگەردىڭ تۋىستارى قاتىستى.

ناجىكەن قاپىشيەۆ سوعىس باستالعانعا دەيىن سەلينوگراد اۋدانى توڭكەرىس اۋىلىندا ءمۇعالىم بولىپ ەڭبەك ەتكەن. مايدانعا 1942 جىلى 114ء-شى اتقىشتار بريگاداسىنىڭ قۇرامىندا اتتاندى. سمولەنسك، ۆيتەبسك، كالينينگراد وبلىستارىن، ليتۆا مەن شىعىس پرۋسسيانى ازات ەتۋگە اتسالىستى. مايدانگەر سوعىستى قاتارداعى جاۋىنگەر رەتىندە باستادى، كاپيتان شەنىنە جەتتى، اتقىشتار روتاسىنىڭ كومانديرى بولدى. ارداگەر ەرلىگى ءۇشىن وردەندەرمەن جانە مەدالدارمەن ماراپاتتالدى.

«ءبىزدىڭ اكەمىز جاۋىنگەرلىك قىزىل تۋ وردەنىنىڭ يەگەرى، ءبىرىنشى جانە ەكىنشى دارەجەلى وتان سوعىسى وردەندەرىمەن، ەكى قىزىل جۇلدىز وردەنىمەن، «جاۋىنگەرلىك ەڭبەگى ءۇشىن» مەدالىمەن ماراپاتتالعان. ونىڭ ماراپاتتارى ونىڭ ەرلىگىن كورسەتەدى. سول سەبەپتى ءبىز ونى ماقتان تۇتامىز»، - دەدى ارداگەردىڭ قىزى باقىت قاپىشيەۆا.

رەسمي بولىمنەن كەيىن ءىس-شارا گۇل شوقتارىن قويۋمەن جالعاستى.