Jeńis kúniniń 80 jyldyǵy qarsańynda Uly Otan soǵysynyń ardageri Nájiken Qapyshevke eskertkish taqta ornatyldy. Saltanatty shara maıdanger turǵan úıdiń janynda ótti,- dep habarlaıdy Dalanews.kz
Memorıaldyq taqtanyń ashylý saltanatyna Astana qalasy ákiminiń orynbasary Eset Baıken, Baıqońyr aýdanynyń ákimi Talǵat Rahmanberdi, ardagerler keńesiniń, kúsh qurylymdarynyń ókilderi, ardagerdiń týystary qatysty.
Nájiken Qapyshev soǵys bastalǵanǵa deıin Selınograd aýdany Tóńkeris aýylynda muǵalim bolyp eńbek etken. Maıdanǵa 1942 jyly 114-shi atqyshtar brıgadasynyń quramynda attandy. Smolensk, Vıtebsk, Kalınıngrad oblystaryn, Lıtva men Shyǵys Prýssıany azat etýge atsalysty. Maıdanger soǵysty qatardaǵy jaýynger retinde bastady, kapıtan shenine jetti, atqyshtar rotasynyń komandıri boldy. Ardager erligi úshin ordendermen jáne medaldarmen marapattaldy.
«Bizdiń ákemiz Jaýyngerlik Qyzyl Tý ordeniniń ıegeri, birinshi jáne ekinshi dárejeli Otan soǵysy ordenderimen, eki Qyzyl Juldyz ordenimen, «Jaýyngerlik eńbegi úshin» medalimen marapattalǵan. Onyń marapattary onyń erligin kórsetedi. Sol sebepti biz ony maqtan tutamyz», - dedi ardagerdiń qyzy Baqyt Qapysheva.
Resmı bólimnen keıin is-shara gúl shoqtaryn qoıýmen jalǵasty.
