– قازاقستان رەسپۋبليكاسىنىڭ «مەملەكەتتىك الەۋمەتتىك كومەك تۋرالى» زاڭىنىڭ بابىنا سايكەس، استانا قالاسىندا تۇراقتى تىركەلگەن استانا قالاسىنىڭ تۇراقتى تۇرعىندارى اتاۋلى الەۋمەتتىك كومەك الۋعا قۇقىلى. توقسان سايىن تاعايىندالاتىن جانە اي سايىن تولەنەتىن اتاۋلى الەۋمەتتىك كومەكتى تاعايىنداۋ ءۇشىن قۇجاتتاردى ۇسىنۋ ءۇشىن اتاۋلى الەۋمەتتىك كومەك الۋعا ۇمىتكەرلەر بەيبىتشىلىك كوشەسى، 14 مەكەنجايىندا ورنالاسقان «جانۇيا» وتباسى ينستيتۋتىن قولداۋ ورتالىعىنا جۇگىنە الادى، – دەدى ايگۇل تالاسوۆا.
ونىڭ ايتۋىنشا، اتاۋلى الەۋمەتتىك كومەك الۋ ءۇشىن تابىس تۋرالى مالىمەت بەرۋ كەرەك. وتباسىنىڭ جيىنتىق تابىسىن ەسەپتەۋ تۋرالى زاڭناماعا سايكەس تابىسۇا جالاقى جانە الەۋمەتتىك تولەمدەر تۇرىندە الىنعان كىرىستەر كىرەدى.
ونىڭ ىشىندە كەيبىر الەۋمەتتىك تولەمدەر – ءتورت جانە ودان دا كوپ بالاسى بار كوپ بالالى وتباسىلارعا بەرىلەتىن ارناۋلى مەملەكەتتىك جاردەماقىلار؛ 2011 جىلعى 26 جەلتوقسانداعى «نەكە (ەرلى-زايىپتىلىق) جانە وتباسى تۋرالى» كودەكسىندە كورسەتىلگەن بالالارعا ارنالعان اليمەنت تۇرىندەگى تابىستار؛ كاسىپكەرلىك تابىس؛ جىلجىمايتىن مۇلىكتى، كولىك قۇرالدارىن جالعا بەرۋدەن جانە ساتۋدان تۇسەتىن كىرىستەر؛ باعالى قاعازداردان تۇسكەن تابىس؛ سىيعا تارتۋ، جىلجىمايتىن مۇلىكتى، كولىك قۇرالدارىن جانە باسقا دا مۇلىكتى مۇراعا الۋ تۇرىندە الىنعان كىرىستەر؛ اقشالاي قاراجاتتى وتەۋسىز الۋ تۇرىندەگى كىرىستەر؛ قولما-قول سالىمدار بويىنشا سالىمدار تۇرىندەگى كىرىستەر جانە جازباشا وتىنىشپەن راستالعان باسقا دا كىرىستەر جاتادى.
ءوز كەزەگىندە ايگۇل تالاسوۆا استانا ءۇشىن كەدەيشىلىك شەگى 35 482 تەڭگەنى قۇرايتىنىن ايتتى. ەگەر وتباسىنداعى جان باسىنا شاققانداعى ورتاشا تابىس وسى شەكتەن تومەن بولسا، وندا اتاۋلى الەۋمەتتىك كومەك تاعايىندالادى. كومەك مولشەرى وتباسىنىڭ جان باسىنا شاققانداعى ورتاشا تابىسى مەن كەدەيلىك شەگى اراسىنداعى ايىرماشىلىق نەگىزىندە ەسەپتەلەدى جانە وتباسىنىڭ ءاربىر مۇشەسىنە ەسەپتەلەدى.
