استانا قالاسىنىڭ اكىمى جەڭىس قاسىمبەك Instagram پاراقشاسىندا ەرەكشە قاجەتتىلىگى بار بالالارعا قانداي قولداۋ كورسەتىلەتىنىن ءمالىم ەتتى، دەپ حابارلايدى ەلوردا اكىمدىگىنىڭ رەسمي سايتى.

«ەرەكشە بالالارمەن جانە ولاردىڭ اتا-انالارىمەن كەزدەستىم. تۇيتكىلدى ماسەلەلەردى، ونىڭ ىشىندە كەڭەستىڭ جاڭا مىندەتتەرىن بىرلەسە تالقىلادىق. قوعامدىق كەڭەس جۇمىس ىستەگەن ءبىر جىلدا «بولاشاق» كورپوراتيۆتىك قورىمەن بىرلەسىپ، بالاباقشالاردا ينكليۋزيانى قولداۋعا ارنالعان 11 كابينەت اشتىق، مۇمكىندىگى شەكتەۋلى بالالارمەن جۇمىس ىستەيتىن 150-گە جۋىق مامان وقىتتىق. ەرەكشە ءبىلىم بەرۋ قاجەتتىلىكتەرى بار 100-دەن استام بالا ءۇشىن سپورت تۇرلەرى بويىنشا سپورت سەكسيالارى مەن توپتارىنا بارۋ شاراسى ۇيىمداستىرىلدى.

سونىمەن قاتار، الەۋمەتتەنۋ جانە ودان ءارى جۇمىسقا ورنالاسۋ ءۇشىن كوللەدجدەردە ەرەكشە ءبىلىم بەرۋ قاجەتتىلىكتەرى بار بالالاردى كاسىپتىك وقىتۋ پيلوت رەتىندە ىسكە قوسىلدى. بۇگىن قوعامدىق تاماقتانۋ جانە سەرۆيس كوللەدجى بازاسىنداعى وقۋ-وندىرىستىك كومبيناتقا باردىق.

جوبانىڭ العاشقى ىسكە قوسىلۋىنا 35 ءجاسوسپىرىم قاتىسادى. ولار «تىگىن ءوندىرىسى جانە كيىمدى مودەلدەۋ»، «تاماقتاندىرۋدى ۇيىمداستىرۋ – اسپاز»، «تاماقتاندىرۋدى ۇيىمداستىرۋ – كونديتەر» جانە «ساندىك-قولدانبالى ونەر» باعىتتارى بويىنشا ءبىلىم الادى.

وقىتۋ قوعامدىق تاماقتاندىرۋ جانە سەرۆيس كوللەدجى مەن بيزنەس، مەنەدجمەنت جانە ءبىلىم بەرۋ كوللەدجى بازالارىندا وتەدى. كۋرستاردىڭ ۇزاقتىعى – 4 اي. وقۋ اياقتالعاننان كەيىن كۋرستى بىتىرگەنى تۋرالى مەملەكەتتىك ۇلگىدەگى كۋالىك بەرىلەدى.

سول سياقتى بيىل بالاباقشالاردا ينكليۋزيانى قولداۋعا ارنالعان 20-دان استام كابينەت اشۋدى، قوعامدىق تاماقتاندىرۋ جانە قىزمەت كورسەتۋ كوللەدجىنىڭ جانىنان ەرەكشە ءبىلىم بەرۋ قاجەتتىلىكتەرى بار بالالارعا ارنالعان «كونديتەر» جانە «تىگىنشى» ارنايى توپتارىن ىسكە قوسۋدى جوسپارلاپ وتىرمىز»، – دەپ جازدى جەڭىس قاسىمبەك.