Astana qalasynyń ákimi Jeńis Qasymbek Instagram paraqshasynda erekshe qajettiligi bar balalarǵa qandai qoldaý kórsetiletinin málim etti, dep habarlaidy elorda ákimdiginiń resmi saity.
«Erekshe balalarmen jáne olardyń ata-analarymen kezdestim. Túitkildi máselelerdi, onyń ishinde keńestiń jańa mindetterin birlese talqyladyq. Qoǵamdyq keńes jumys istegen bir jylda «Bolashaq» korporativtik qorymen birlesip, balabaqshalarda inkliýziiany qoldaýǵa arnalǵan 11 kabinet ashtyq, múmkindigi shekteýli balalarmen jumys isteitin 150-ge jýyq maman oqyttyq. Erekshe bilim berý qajettilikteri bar 100-den astam bala úshin sport túrleri boiynsha sport sektsiialary men toptaryna barý sharasy uiymdastyryldy.
Sonymen qatar, áleýmettený jáne odan ári jumysqa ornalasý úshin kolledjderde erekshe bilim berý qajettilikteri bar balalardy kásiptik oqytý pilot retinde iske qosyldy. Búgin qoǵamdyq tamaqtaný jáne servis kolledji bazasyndaǵy oqý-óndiristik kombinatqa bardyq.
Jobanyń alǵashqy iske qosylýyna 35 jasóspirim qatysady. Olar «Tigin óndirisi jáne kiimdi modeldeý», «Tamaqtandyrýdy uiymdastyrý – Aspaz», «Tamaqtandyrýdy uiymdastyrý – Konditer» jáne «Sándik-qoldanbaly óner» baǵyttary boiynsha bilim alady.
Oqytý qoǵamdyq tamaqtandyrý jáne servis kolledji men biznes, menedjment jáne bilim berý kolledji bazalarynda ótedi. Kýrstardyń uzaqtyǵy – 4 ai. Oqý aiaqtalǵannan keiin kýrsty bitirgeni týraly memlekettik úlgidegi kýálik beriledi.
Sol siiaqty biyl balabaqshalarda inkliýziiany qoldaýǵa arnalǵan 20-dan astam kabinet ashýdy, qoǵamdyq tamaqtandyrý jáne qyzmet kórsetý kolledjiniń janynan erekshe bilim berý qajettilikteri bar balalarǵa arnalǵan «Konditer» jáne «Tiginshi» arnaiy toptaryn iske qosýdy josparlap otyrmyz», – dep jazdy Jeńis Qasymbek.
