Astanadaǵy SOS Balalar aýylynda Qytaidyń Energy China korporatsiiasy qarjylandyrǵan shatyrlyq kún elektr stantsiiasynyń resmi iske qosylý rásimi ótti, dep habarlaidy dalanews.kz.
Is-sharaǵa Qytai Halyq Respýblikasynyń Qazaqstandaǵy Tótenshe jáne Ókiletti Elshisi Han Chýnlin, qytailyq kompaniialardyń ókilderi, áleýmettik uiymdar men balalar aýylynyń tárbielenýshileri qatysty.
Joba aiasynda balalar aýylyna qýaty 10 kVt bolatyn kún elektr stantsiiasy, energiia jinaqtaý júiesi, zariadtaý qurylǵylary jáne kún batareiasymen jumys isteitin kóshe shamdary ornatyldy. Joba quny shamamen 25 myń AQSh dollaryn quraidy. Uiymdastyrýshylardyń aitýynsha, jańa júie mekemeniń elektr energiiasyna degen qajettiliginiń shamamen jartysyn qamtamasyz etýge múmkindik beredi.
Saltanatty rásimde sóz sóilegen Qytaidyń Qazaqstandaǵy elshisi Han Chýnlin balalarǵa qamqorlyq jasaý eki el arasyndaǵy gýmanitarlyq yntymaqtastyqtyń mańyzdy baǵyty ekenin atap ótti.
«Balalar – memlekettiń úmiti, ulttyń bolashaǵy. Sondyqtan olardyń qaýipsiz ári jaily ortada ósip, sapaly bilim alýyna jaǵdai jasaý bárimizdiń ortaq mindetimiz. Qytailyq kásiporyndar Qazaqstanda tek biznes júrgizip qana qoimai, áleýmettik jaýapkershilikti de sezinedi. Biz balalarǵa qoldaý kórsetý arqyly olardyń armandaryna qanat bitirip, bolashaqqa senimmen qaraýyna úles qosýdy maqsat etemiz. Qazaqstan men Qytai arasyndaǵy dostyq kelesi urpaq arqyly jalǵasa beretinine senemin», - dedi elshi.
Is-shara barysynda qonaqtar balalardyń shyǵarmashylyq kórmesin tamashalap, tárbielenýshilermen birge arnaiy interaktivti baǵdarlamalarǵa qatysty.
Energy China ókilderi bul bastama qaiyrymdylyq aktsiiasymen ǵana shektelmeitinin aitty. Kompaniia Qazaqstandaǵy áleýmettik jobalarǵa qatysýdy jalǵastyryp, ekologiialyq taza tehnologiialardy engizýge basymdyq bermek.
Uiymdastyrýshylardyń málimetinshe, Energy China búginde Qazaqstanda jalpy quny milliardtaǵan dollardy quraityn energetikalyq jáne infraqurylymdyq jobalardy júzege asyryp keledi. Kompaniia kún jáne jel energetikasyn damytý baǵytynda da birqatar iri jobalardy qolǵa alǵan.
SOS Balalar aýylynyń direktory Gúlnar Ýskenbaeva jańa joba tárbielenýshiler úshin úlken múmkindik ekenin atap ótti.
«Bul biz úshin jai ǵana tehnikalyq joba emes. Eń aldymen balalardyń bolashaǵyna jasalǵan investitsiia dep qabyldaimyz. Kún elektr stantsiiasy kommýnaldyq shyǵyndardy azaityp qana qoimai, tárbielenýshilerge jasyl energetikanyń múmkindikterin tanystyrýǵa jol ashady. Bizge kórsetilgen qoldaý balalardyń ómir súrý jáne bilim alý jaǵdaiyn jaqsartýǵa kómektesedi. Osyndai seriktestik pen qamqorlyq úshin barlyq demeýshilerge alǵysymyzdy bildiremiz», - dedi ol.
Aita keteiik, SOS Balalar aýyly Astanada 2000 jyldan beri jumys isteidi. Qazirgi ýaqytta munda ata-ana qamqorlyǵynsyz qalǵan jáne qiyn ómirlik jaǵdaiǵa tap bolǵan ondaǵan bala tárbielenýde.
