Astana qalasynyń máslihaty elordanyń bas josparyna engizilgen ózgeristerdi maquldap, bolashaq halyqaralyq áýejai salynatyn aýmaqty bekitti, dep habarlaidy dalanews.kz.
Bul týraly jýrnalist Erkanat Kópjasaruly Facebook paraqshasynda málimdedi.
Málimetke sáikes, mamandar jańa áýejai úshin qalanyń soltústik-batys bóligindegi, Shortandy baǵytyna qarai ornalasqan jáne Astana – Kókshetaý avtojolyna irgeles aýmaqty tańdaǵan. Atalǵan nusqa kólik qatynasy men bolashaq infraqurylymdyq damý múmkindikteri turǵysynan eń tiimdi dep tanylǵan.
Jospar boiynsha jańa áýejai Astana qalasynyń ákimshilik shekarasynan shamamen 48 shaqyrym jerde ornalasady. Al «Nurly jol» temirjol vokzalynan áýe ailaǵyna deiingi araqashyqtyq 73 shaqyrymdy quraidy.
Joba elordanyń kólik-logistikalyq áleýetin arttyrýǵa jáne aldaǵy jyldary jolaýshylar aǵynynyń ósýin qamtamasyz etýge baǵyttalǵan. Sarapshylardyń pikirinshe, jańa halyqaralyq áýejaidyń salynýy Astananyń tranzittik múmkindikterin keńeitip, halyqaralyq baǵyttar jelisin damytýǵa qosymsha serpin beredi.
Qazirgi ýaqytta qoldanystaǵy Astana halyqaralyq áýejaiy jolaýshylar aǵynynyń turaqty ósýin bastan ótkerip otyr. Osyǵan bailanysty jańa áýe habyn salý máselesi elordanyń uzaqmerzimdi damý jospary aiasynda qarastyrylýda.
