Almaty ákimi Darhan Satybaldynyń tapsyrmasymen Sain kóshesin Rysqulov dańǵylynan Móńke bi kóshesine deiin uzartý jobasy boiynsha kólik qozǵalysy tehnikalyq túrde ashyldy. Jańa ýchaskeniń uzyndyǵy – 3,2 km, dep habarlaidy dalanews.kz.
Jobany júzege asyrý 2018 jyly bastalǵan bolatyn. Jumystar jer telimderin satyp alý jumystarynyń aiaqtalýyna qarai kezeń-kezeńimen júrgizildi. Sońǵy jer telimi 2025 jyly qazan aiynda bosatyldy.
Jol infraqurylymyn damytý basqarmasy ókilderiniń málimetinshe, 20 mamyrǵa josparlanǵan qozǵalysty ashý aýa raiynyń qolaisyzdyǵyna bailanysty keiinge shegerildi. Qolaisyz aýa raiy 110 kV elektr berý jelisin kóshirý jumystaryn kesheýildetken.
Qazirgi ýaqytta jol boiynda asfaltbeton jabynynyń tómengi qabaty tóseldi. Negizgi qurylys-montaj jumystary aiaqtalǵannan keiin asfalttyń joǵarǵy qabaty tóseledi.
Sondai-aq, ýchaskede qosalqy joldardy, júrginshiler joldaryn, velosiped joldaryn salý jáne oǵan irgeles aýmaqtardy kórkeitý jumystary jalǵasýda.
Jol qozǵalysy qaýipsizdigin qamtamasyz etý maqsatynda barlyq qurylys-montaj jumystary tolyq aiaqtalǵanǵa deiin bul ýchaskede jyldamdyq shegi 40 km/saǵ bolyp belgilendi.
Júrgizýshiler jol belgileriniń talaptaryn jáne jol qozǵalysy erejelerin qatań saqtaýǵa tiis.
