Mamyr aiynda Qazaqstannyń memlekettik shekarasynda zań buzǵan 3881 adam ustaldy, dep habarlaidy dalanews.kz.
Olardyń 1125-i shetel azamattary. Bul týraly Ulttyq qaýipsizdik komitetiniń Shekara qyzmeti habarlady.
Vedomstvo málimetinshe, bir ai ishinde memlekettik shekara arqyly taýarlar men júkterdi zańsyz ótkizýdiń 1180 faktisiniń joly kesilgen. Sonymen qatar 41 esirtki tasymaldaý jáne qarý-jaraq pen oq-dárini zańsyz alyp ótýdiń 61 faktisi anyqtalǵan.
Tekserý barysynda eki atys qarýy, 42 sýyq qarý jáne 118 oq-dári tárkilendi.
Sondai-aq shekarashylar janar-jaǵarmai materialdaryn zańsyz tasymaldaýdyń 406 deregin anyqtady. Zańsyz ótkizilmek bolǵan janar-jaǵarmaidyń jalpy kólemi 85 tonnadan asqan. Budan bólek, halyq tutynatyn taýarlardy zańsyz alyp ótýdiń 526 faktisi tirkelip, olardyń quny 665 million teńgeden asqany belgili boldy.
Shekara qyzmetiniń málimetinshe, ulttyq valiýtany zańsyz tasymaldaýdyń 146 faktisi anyqtalyp, jalpy somasy 1,5 milliard teńgege jetken.
Kaspii teńiziniń qazaqstandyq bóliginde brakonerlikpen ainalysýdyń 12 faktisi toqtatyldy. Zańsyz balyq aýlaý quraldary men bekire tuqymdas balyqtar tárkilengen.
Vedomstvonyń baǵalaýynsha, aldyn alynǵan jalpy shyǵyn kólemi 210 million teńgeden asty.
Atalǵan faktiler boiynsha Shekara qyzmeti óz quzyreti aiasynda 62 qylmystyq is qozǵady. Qazirgi ýaqytta tergeý amaldary júrgizilýde. Qalǵan materialdar protsessýaldyq sheshim qabyldaý úshin quqyq qorǵaý jáne sot organdaryna joldanǵan.
