ق ر پرەمەر-مينيسترى اسقار مامين تۇڭعىش پرەزيدەنت – ەلباسى نۇرسۇلتان نازاربايەۆتىڭ جانە مەملەكەت باسشىسى قاسىم-جومارت توقايەۆتىڭ تۇركىستان وبلىسىن دامىتۋ جونىندەگى تاپسىرمالارىن ورىنداۋ بويىنشا وڭىرگە جۇمىس ساپارىمەن باردى.

ۇكىمەت باسشىسى تۇركىستان قالاسىن جاڭعىرتۋدىڭ 1-كەزەڭى اياسىنداعى جۇمىستار بارىسىن تەكسەردى، ونىڭ ىشىندە اكىمشىلىك، الەۋمەتتىك جانە تاريحي-مادەني ماڭىزى بار نىساندار: اكىمدىك، باسقارمالار جانە دەپارتامەنتتەر عيماراتتارىنىڭ، مەديا ورتالىقتىڭ، «نۇر-سۇلتان» الاڭىنىڭ، وليمپيادا ريەۆەرۆى سپورت مەكتەبىنىڭ، حالىققا قىزمەت كورسەتۋ ورتالىعىنىڭ، مۋزىكا مەكتەبىنىڭ، اتتراكسيوندارى بار قالا ساياباعىنىڭ، نەكە قيۋ سارايىنىڭ، ۆيزيت-ورتالىقتىڭ، شىعىس مونشاسىنىڭ، امفيتەاتر مەن قالالىق ارباتتىڭ قۇرىلىسىن تەكسەردى.

تۇركىستان – كەلەشەك جاسىل جەلەكتى قالاعا اينالماق. شاھار كوركىنە كورىك قوسۋ ءۇشىن كوپتەگەن تىندىرىمدى جۇمىستار قولعا الىنۋدا. تۇركىستان وبلىسىنا جۇمىس ساپارمەن كەلگەن ەلىمىزدىڭ پرەمەر-مينيسترى اسقار مامين مەن ايماق باسشىسى ءومىرزاق شوكەيەۆ «نۇرتاس وڭداسىنوۆ» اللەياسىندا اعاش وتىرعىزىپ، ەلىمىزدىڭ بارلىق وڭىرلەرىندە بولاتىن ەكولوگيالىق ساعات  – جاڭا رەسپۋبليكالىق اكسيانى باستاپ بەردى.

تۇركىستاندا اپتاپ ىستىقتان سايا بولاتىن جاسىل بەلدەۋ جۇمىسى بارىسىندا اۋدان مەن قالا جۇرتى اسارلاتىپ، 220 مىڭ ءتۇپ اعاش ەگۋدى جوسپارلاپ وتىر.

قازاقتا «ءجۇز جىلدىعىن ويلاعان حالىق اعاش ەگەدى» دەگەن ءتامسىل ءسوز بار. «ەكو ساعات!» رەسپۋبليكالىق اكسياسى اياسىندا مۇندا 20 ءتۇپ كاشتان، 30 ليپ اعاشى مەن 50 ءتۇپ ارشا بوي كوتەرمەك.

– ماقساتىمىز – ءوزىمىز ءومىر ءسۇرىپ جاتقان كونە شاھار تۇركىستاندى كوگالداندىرىپ، كوركەيتۋ. وڭتۇستىك ءوڭىرى اعاش وسىرۋگە وتە قولايلى ايماق. اينالامىزدى جاسىل جەلەككە بولەپ، قورشاعان ورتامىزدىڭ كوگالداندىرۋعا ءبارىمىز اتسالىسۋىمىز كەرەك. وسىنداي جۇيەلى جۇمىستىڭ ناتيجەسىندە دەنى ساۋ ۇرپاق، باياندى بولاشاق قالىپتاسادى، – دەدى ءومىرزاق ەستاي ۇلى اتالعان شارانىڭ ماڭىزدىلىعىن العا تارتا.

تۇركىستان قالاسى اينالاسىنان جاسىل بەلدەۋ قۇرۋ ماقساتىندا بۇگىندە 488 گەكتار جەرگە 203 496 ءتۇپ اعاش كوشەتتەرى (قاراعاش، بادام، ورىك، تەرەك، جيدە) ەگىلگەن.

سونىمەن قاتار، بۇگىندە 2-كەزەڭ بويىنشا ارىس-تۇركىستان كانالى بويىنداعى جەرلەردى جاپپاي جىرتۋ جانە اعاش كوشەتتەرىن ەگۋ جۇمىستارى جۇرگىزىلۋدە. الداعى ۋاقىتتا جاسىل بەلدەۋگە ەگىلەتىن كوشەتتەردى ءوندىرۋ ماقساتىندا 300 گەكتار جەرگە تۇقىمباق اشىپ، ونىڭ 30 گەكتار اۋماعىنا اعاش تۇقىمدارىن سەبۋ جانە 1212 گەكتار جەردى جىرتىپ، 100 گەكتارىنا اعاش كوشەتتەرىن ەگۋ جۇمىستارى اتقارىلماق. جالپى، رەسپۋبليكالىق ماڭىزى بار شارا شەڭبەرىندە، ەلىمىزدە 1 ميلليون اعاش ەگىلەدى.