بۇگىندە اسكەريلەر اراسىندا پاتريوتتىق سەزىمدى ارتتىرۋدىڭ ماڭىزى زور. ويتكەنى، قارۋلى كۇشتەر اراسىندا پاتريوتتىق سەزىمدى ارتتىرۋ – مەملەكەتتىڭ قاۋىپسىزدىگىن قامتاماسىز ەتۋدە ماڭىزدى رول اتقاراتىنىن ەشقاشان جادىمىزدان شىعارماعان ءجون. باياعىدا مەكتەپ بىتىرگەن بوزبالالار ەكى جىل اسكەردە بولىپ، سىمداي تارتىلىپ كەلۋشى ەدى.
ءقازىر كوپتەگەن اتا-انا بالاسىن اسكەرگە جىبەرمەۋدىڭ امالىن قاراستىرادى. ونىڭ ءوزىندىڭ سەبەبى دە جوق ەمەس. اتا-انالار اسكەردەگى الەمجەتىكتەن قورقادى. سول سەبەپتى بالاسىن اسكەرگە جىبەرگىسى كەلەمەيدى. ءبىراق ءاربىر ەر ازامات ءۇشىن وتان الدىنداعى جاۋاپكەرشىلىكتى قالىپتاستىرۋدا اسكەري ءومىردىڭ الاتىن ورىنى ەرەكشە. ونى اسكەردەن باسقا ەش جەر بەرە المايدى.
ەل ىشىندە اسكەردىڭ تارتىمدىلىعىن ارتتىرۋ ءۇشىن پاتريوتتىق تاربيەلىك ءمانى زور باعدارلامالارىدى كوبەيتۋ كەرەك. بۇگىندە اسكەر قاتىرانى شاقىرىلعان جاستاردىڭ ءبارى وتان الدىنداعى بورىشىن ەل ىشىندەگى اسكەري بولىمشەلەردە وتەيدى.
سوندىقتان ساربازداردىڭ پاتريوتتىق سەزىمىن كۇشەيتەتىن باعدارلامالاردى دايىنداۋدا ىسىنە ولاردىڭ اتا-انالارىن دا تارتۋدىڭ ماڭزى زور. كەز كەلگەن اتا-انانى وسى ىسكە ارالاسۋعا ۇسىنىس ايتسا، تارتىنباي قاتىساتىنى انىق.
وسىنداي باعدارلامالاردىڭ كومەگىمەن ساربازدار ءۇشىن ارنايى پاتريوتتىق تاربيە ساباقتارى ۇيىمداستىرساق، اسكەردەگى ءتارتىپ جاقسارا تۇسەتىنى ءسوزسىز. وسىلايشا اسكەردەگى جايسىز جايتتاردى پاتريوتتىق سەزىمدى كۇشەيتىپ، جويۋعا بولادى.
ءاربىر ساربازدىڭ ساناسىنا قاسىنداعى قارۋلاس دوسى ەل قورعاۋدا قاسىنان تابىلاتىن سەرىگى ەكەنىن سىڭىرەتىن بولساق، ولار بىر-بىرىنە وسپادارلىقپەن قول كوتەرىپ، قاتەلىككە بارماسى انىق.
سونىمەن قاتار مۇنداي پارتيوتتىق ءمانى زور ءتاربىي ساباقتارىندا قازاقستان تاريحى، ۇلتتىق باتىرلار، تاۋەلسىزدىك جولىنداعى كۇرەس، اتا زاڭ جانە مەملەكەتتىك رامىزدەر تۋرالى كەڭىنەن مالىمەت بەرگەن ءجون. بۇل – باعىتتاعى تاعىلىمدى اڭگىمەلەر جاۋىنگەرلىك رۋحتى كوتەرەتىنى ءسوزسىز.
سونىمەن قاتار اسكەردەگى ساربازدارىمىزدىڭ مادەنيتتى ۇلتجاندى بولۋى ءۇشىن اسكەري بولىمشەلەردە تەاترلاندىرىلعان قويىلىمدار، دەرەكتى فيلمدەر، ادەبي كەشتەر جانە وتان قورعاۋشىلاردىڭ ءومىرى مەن ەرلىكتەرىن ناسيحاتتايتىن كورمەلەر ۇزدىكسىز وتكىزۋدە ارتىقتىق ەتپەس ەدى.
قازىرگى تاڭدا ەلىمىزدىڭ بارلىق وبلىسىندا تەاترلار جۇمىس ىستەيدى. وسى تەاترلاردىڭ جازدا ەلىمىزدىڭ تۇكپىر-تۇكپىرىندەگى اسكەري بولىمشەلەردى ارالاپ، گوسترولدىك ساپارلارعا شىعۋى كەرەك. ءقازىر ءاربىر تەاتردىڭ رەپەرتۋرىندا حالىقتىڭ وتانشىلىدىق سەزىمىن ارتتىراتىن بىرنەشە قويىلىمدارى بار. سولاردى ساربازداردىڭ نازارىنا ۇسىناتىن بولساق، اسكەردەگى جاستارىمىزدىڭ تانىم دەڭگەيى كەڭەيە تۇسەتىنى انىق.
اسكەردە تەاتر قويىلىمدارىن تاماشالاعان تالاي اۋىل بالاسى كەيىن تەاتردىڭ تۇراقتى كورەرمەنىنە اينالاتىنى ءسوزسىز. سوندىقتان ەلىمىزدەگى تەاترلار وزدەرىنىڭ ءماندى دە، ماعىنالى قويىلىمدارىمەن اسكەردە جۇرگەن ساربازداردىڭ بويىندا پاتريوتتىق سەزىمىن قالىپتاستىرۋعا ءوز ۇلەستەرىن قوسۋى كەرەك دەپ ەسەپتەيمىز.
