قاراساي اۋداندىق باس مەملەكەتتىك سانيتارلىق دارىگەردىڭ قاۋلىسىنا سايكەس «اسىل ارمان» تۇرعىن ءۇي كەشەنىندەگى كارانتين الىندى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.

ەسكە سالساق، وبلىستاعى 3ء-شى سىرقات 1995 جىلى تۋعان، جۇكتىلىكتىڭ 21-22 اپتاسىنداعى ايەل «اسىل ارمان» تك تۇرعىنى بولاتىن. مۇنان كەيىن وسى تۇرعىن ءۇي كەشەنىندە تۇراتىن 1957 جىلى تۋعان تاعى ءبىر ايەلدىڭ اۋىرعانى انىقتالعان ەدى. وسىعان بايلانىستى كوروناۆيرۋس ينفەكسياسىنىڭ بۇدان ءارى تارالۋىنا جول بەرمەۋ ماقساتىندا «اسىل ارمان» تۇرعىن ءۇي كەشەنىندە  1 ساۋىردەن باستاپ كارانتين ەنگىزىلگەن. سول ۋاقىتتان بەرى تۇرعىن ءۇي كەشەنى اۋماعىندا مەديسينا قىزمەتكەرلەرىمەن جانە ءتارتىپ ساقشىلارىمەن بىرگە اسكەري-ەرىكتىلەر دە قىزمەت ەتتى.

بۇگىنگى كۇنى تۇرعىن ءۇي كەشەنىنىڭ تۇرعىنى، 1995 جىلى تۋعان ايەل قايتالاي اناليز الىنعاننان كەيىن اۋرۋحانادان شىعارىلدى، ال 1957 جىلى تۋعان تۇرعىن ەم قابىلداپ جاتىر.

قارىم-قاتىناستا بارلىعى 23 ادام بولعانى انىقتالىپ، ولاردان ۆيرۋسولوگيالىق اناليز الىنعان، اناليز قورىتىندىلارى تەرىس بولىپ شىقتى.