ەلىمىزدىڭ يندۋستريا جانە ينفراقۇرىلىمدىق دامۋ ءمينيسترىنىڭ ءبىرىنشى ورىنباسارى قايىربەك وسكەنبايەۆتىڭ ايتۋىنشا، اپات كەزىندە 7 مىڭ 634 ءۇي بۇلىنگەن.
بۇگىنگە دەيىن 7 مىڭ 335ء-سى تولىق قالپىنا كەلتىرىلدى. كوميسسيانىڭ شەشىمىمەن تۇرۋعا جارامسىز دەپ تانىلعان 466 باسپانا قايتا سالىنۋدا.
بۇگىنگە دەيىن ونىڭ 188-دە قۇرىلىس جۇمىستارى اياقتالىپ، 142 ۇيدە ارلەۋ جۇمىستارى جۇرگىزىلىپ جاتىر. تاعى 278 ءۇيدىڭ قۇرىلىسى جۇرۋدە.
ارىس قالاسىندا بارلىعى 66 الەۋمەتتىك نىسان بار. ونىڭ ىشىندە 53 ءبىلىم بەرۋ مەكەمەسى، 8 دەنساۋلىق ساقتاۋ، 4 سپورت، 1 داڭق اللەياسى. بۇگىندە سونىڭ 59 نىسانى تاپسىرىلدى. ايتا كەتەيىك، ارىستى قالپىنا كەلتىرۋ ءۇشىن 16 سەكتورعا ءبولىپ، ءار سەكتورعا ءبىر-بىر وبلىستى جاۋاپتى ەتىپ بەكىتكەن بولاتىن.
بۇگىنگە دەيىن 9 سەكتوردا قۇرىلىس جۇمىستارى تولىق اياقتالىپ، قۇرىلىسشىلار ۇيلەرىنە قايتارىلدى. قالعان سەكتورلاردا 4 مىڭعا جۋىق قۇرىلىسشى جۇمىس ىستەپ جاتىر. نۇر-سۇلتان قالاسىنا قاراستى سەكتوردا 57 كوپ قاباتتى جانە 642 جەكە تۇرعىن ءۇي بار. 219 جەكە تۇرعىن ءۇيدىڭ جوندەۋ جۇمىستارى اياقتالىپ، 267-ىندە ارلەۋ جۇمىستارى جالعاسۋدا. ال 156 ءۇي تولىق قايتا سالىنۋدا.
تويگۇل الەنوۆا، ارىس قالاسىنىڭ تۇرعىنى:
- سنوسقا كەتتى ءۇيىمىز، سودان باسىنان باستاپ سالدى. راحمەت بالالارعا، ولاردىڭ وزدەرى دە جاڭادان باستاپ جاتىر. فيرماعا راقمەت، ەلباسىنا راقمەت، حالقىمىزعا راقمەت. وسى حالىقتىڭ ارقاسى ايتپەسە مۇمكىن ەمەس. ازىق-تۇلىگىمىزدى جەتكىزىپ بەردى حالىق.
