اقتوبە وبلىسىندا كەزەكتى اپپارات ماجىلىسىندە مەملەكەتتىك ورگاندارداعى قىزمەتتىك ادەپ نورمالارىنىڭ ساقتالۋى، مورالدىق-پسيحولوگيالىق احۋال جانە سىبايلاس جەمقورلىقتىڭ الدىن الۋ ماسەلەلەرى قارالدى، دەپ حابارلايدى Dalanews.kz.
قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ اقتوبە وبلىسى بويىنشا دەپارتامەنتىنىڭ باسشىسى ايبەك ءشىلمانوۆ وڭىردە قىزمەتتىك ادەپتى ساقتاۋ جانە سىبايلاس جەمقورلىقتىڭ الدىن الۋ باعىتىندا جۇيەلى جۇمىس جۇرگىزىلىپ جاتقانىن اتاپ ءوتتى. سونىمەن قاتار، جەكەلەگەن بۇزۋشىلىقتار پروفيلاكتيكالىق شارالاردى كۇشەيتۋدى جانە باسشىلاردىڭ جەكە جاۋاپكەرشىلىگىن ارتتىرۋ قاجەتتىگىن كورسەتەتىنىن ايتتى.
جيىن قورىتىندىسى بويىنشا ءوڭىر باسشىسى اسحات شاحاروۆ مەملەكەتتىك ورگانداردىڭ باسشىلارىنا قىزمەتتىك ادەپ پەن سىبايلاس جەمقورلىققا قارسى زاڭناما تالاپتارىن ءتۇسىندىرۋ جانە الدىن الۋ جۇمىستارىن كۇشەيتۋدى، سونداي-اق ۇجىمدارداعى مورالدىق-پسيحولوگيالىق احۋالعا جۇيەلى باقىلاۋ ورناتۋدى تاپسىردى.
«ادەپ نورمالارىنىڭ بۇزىلۋى مەن سىبايلاس جەمقورلىق كورىنىستەرى ازاماتتاردىڭ بيلىككە دەگەن سەنىمىن تومەندەتەدى. ءاربىر باسشى وزىنە باعىنىستى قۇرىلىمدارداعى ءتارتىپ پەن مورالدىق احۋالدىڭ جاعدايىنا جەكە ءوزى جاۋاپتى بولۋى ءتيىس»، – دەپ اتاپ ءوتتى اسحات شاحاروۆ.
مەملەكەتتىك قىزمەت ىستەرى اگەنتتىگىنىڭ دەپارتامەنتى الداعى ۋاقىتتا سىبايلاس جەمقورلىق تاۋەكەلدەرىنە تالداۋ جۇرگىزىپ، مونيتورينگ ناتيجەلەرىن ادەپ كەڭەسىنىڭ وتىرىسىندا قاراۋدى جوسپارلاپ وتىر.
وبلىس اكىمى قىزمەتتىك ادەپ پەن سىبايلاس جەمقورلىقتىڭ الدىن الۋ باعىتىنداعى جۇمىستىڭ تيىمدىلىگى مەملەكەتتىك ورگانداردىڭ ءبىرىنشى باسشىلارىنىڭ تىكەلەي جانە جەكە جاۋاپكەرشىلىگى ەكەنىن العا تارتتى.
