اقتاۋدا قورلىقتان قازا تاپقان الينا سەرىكوۆانىڭ اتىنا راسىمدەلگەن نەسيە قالاي وتەلەتىنى بەلگىلى بولدى، دەپ حابارلايدى Dalanews.kz.
بۇل تۋرالى مارقۇم قىزدىڭ اعاسى باۋىرجان جولجان Tengrinews.kz تىلشىسىنە ايتىپ بەردى.
اعاسىنىڭ ايتۋىنشا، كۇدىكتىلەر ونى 2 ميلليون تەڭگە كولەمىندە تاۋارلىق نەسيە الۋعا ماجبۇرلەگەن.
“ولار ونى وسىلاي ىستەسە عانا بوساتاتىندارىن ايتقان. سايكەسىنشە، الينانىڭ باسقا امالى بولماعان. نەسيە راسىمدەلگەن سوڭ، قىلمىسكەرلەر بازارعا بارىپ، تانىس ساتۋشى ارقىلى اقشانى قولما-قول شەشىپ العان. كەيىن مەن قارىنداسىمنىڭ قايتىس بولعانى تۋرالى انىقتامانى الىپ، بانككە بارىپ، ونىڭ ەسەپشوتىن جابۋ ءۇشىن قۇجاتتار جينادىم. سەبەبى نەسيەگە ءوسىمپۇل قوسىلماۋى كەرەك ەدى،” – دەيدى باۋىرجان جولجان.
ونىڭ ايتۋىنشا، سوت اپەللياسيانى قاراستىرىپ، ايىپتالۋشىلاردىڭ ۇكىمىن وزگەرتكەننەن كەيىن، ولارعا ماتەريالدىق جانە مورالدىق وتەماقى تولەۋ، سونداي-اق 2 ميلليون تەڭگە كولەمىندەگى نەسيەنى جابۋ مىندەتتەلگەن.
“ولاردىڭ وتباسى بۇل سومانى وتەيدى دەپ ويلايمىن. سوت بەلگىلەگەن ماتەريالدىق جانە مورالدىق وتەماقىنى العان سوڭ، قارىنداسىمنىڭ ەسەپشوتىن اشىپ، سەنىمدى تۇلعا رەتىندە بۇل نەسيەنى جاباتىن بولامىن،” – دەدى مارقۇمنىڭ اعاسى.
ەسكە سالايىق، بۇعان دەيىن nemolchikz_official الەۋمەتتىك جەلىدە 2024 جىلدىڭ مامىر ايىندا اقتاۋدا بولعان جانتۇرشىگەرلىك وقيعانى جاريالاعان ەدى.
14 مامىر كۇنى تۇندە اقتاۋدا ءبىر توپ ەر ادام فيتنەس-جاتتىقتىرۋشى بولىپ جۇمىس ىستەگەن قىزدى كولىككە كۇشتەپ وتىرعىزىپ، مەفەدرون بەرىپ زورلاعان. تاڭعا دەيىن قىزدى قيناپ، قالا بەردى تەلەفونى ارقىلى 2 ملن تەڭگە كولەمىندە نەسيە راسىمدەگەن. قىزدىڭ تۋىستارى سوت شەشىمىنە شاعىم ءتۇسىرىپ، ءىستىڭ ءادىل قارالۋىن سۇراپ، اپپەلياسياعا بەردى.
31 قاڭتاردا سوت باستى فيگۋرانت نۇرگەلدى سەيىتقالييەۆتى ءومىر بويىنا باس بوستاندىعىنان ايىردى.
قالعان سوتتالۋشىلارعا ۇزاق مەرزىمدى جازا تاعايىندالدى:
ەركەبۇلان امانقوس – 16 جىل
ارالباي مەرەي – 13 جىل
دارحان قۇلباس – 13 جىل
قۋانىش ۇسەنعالي – 13 جىل
مارقۇمنىڭ وتباسىنا مورالدىق جانە ماتەريالدىق شىعىن رەتىندە 30 ميلليون تەڭگە تولەنەدى.
الينا سەرىكوۆانىڭ ءىسى قوعامدا ۇلكەن رەزونانس تۋدىردى. ونىڭ تۋىستارى سوت شەشىمى ءادىل بولۋىن تالاپ ەتىپ، باستى ايىپتالۋشىعا ەڭ قاتاڭ جازا بەرىلۋىن سۇراعان ەدى. بۇل جاعداي قازاقستانداعى گەندەرلىك زورلىق-زومبىلىقپەن كۇرەس ماسەلەسىن قايتا كۇن تارتىبىنە شىعاردى.
