اشىق اسپان استىندا وتكەن تۋرنيرگە 15 مىڭنان استام كورەرمەن جينالدى. تۋرنيرگە ماڭعىستاۋ وبلىسىنىڭ اكىمى نۇرلان نوعايەۆ، UFC چەمپيونى حابيب نۇرماعامەدوۆ، قازاقستان رەسپۋبليكاسىنىڭ مما، پانكراتيون جانە گرەپپلينگ ارالاس جەكپە-جەك فەدەراسياسىنىڭ پرەزيدەنتى، ق ر ەڭبەك سىڭىرگەن جاتتىقتىرۋشىسى ساعىندىق مەكەيەۆ، Naiza ليگاسىنىڭ پرەزيدەنتى نۇربەك قارابالا، EAGLE FC ليگاسىنىڭ پرەزيدەنتى شاميل زاۆۋروۆ، UFC جاۋىنگەرى شاۆحات راحمونوۆ قاتىستى.
نۇرلان نوعايەۆ قۇتتىقتاۋ سوزىندە سالاۋاتتى ءومىر سالتىن ناسيحاتتاۋ ماقساتىندا وتكىزىلىپ جاتقان حالىقارالىق ءتۋرنيردىڭ ماڭىزدىلىعىن اتاپ ءوتتى.
– قازاقستان پرەزيدەنتى قاسىم-جومارت توقايەۆتىڭ تاپسىرماسى بويىنشا مەملەكەتتىك ورگاندار جاستار مەن جاسوسپىرىمدەر اراسىندا بۇقارالىق سپورت تۇرلەرىن دامىتۋ، سپورتپەن اينالىساتىن ازاماتتار سانىن ارتتىرۋ بويىنشا تۇراقتى جۇيەلى جۇمىس جۇرگىزۋدە. ءبىزدىڭ ەلىمىزدىڭ نامىسىن قورعايتىن جانە كوپتەگەن جاس بۋىنعا ۇلگى بولاتىن بارلىق ۇيىمداستىرۋشىلارعا، قاتىسۋشىلار مەن جاۋىنگەرلەرگە العىسىمدى بىلدىرگىم كەلەدى. بۇل ءتۋرنيردى اقتاۋدا وتكىزۋ حابيب نۇرماعامەدوۆتىڭ اكەسى، مارقۇم ابدۋلماناپ نۇرماعامەدوۆتىڭ يدەياسى ەدى، وكىنىشكە وراي ول ءقازىر ءبىزدىڭ ارامىزدا جوق، ءبىراق ءىزباسارلارى ونىڭ ءىسىن جالعاستىرۋدا، – دەپ اتاپ ءوتتى اكىم نۇرلان نوعايەۆ.
تۋرنيرگە الەمنىڭ جەتى ەلىنەن 32 سپورتشى قاتىسىپ، 16 جەكپە-جەك وتكىزدى.
"Naiza" جانە "EAGLE FC" بىرلەسكەن ءتۋرنيرىنىڭ باستى جەكپە-جەگىندە رەسەيلىك گامزات حيراماگومەدوۆ پەن قازاقستاندىق سپورتشى داۋرەن ەرمەكوۆ "EAGLE FC" بەلدىگى ءۇشىن كەزدەسۋ وتكىزدى. ەكىنشى راۋندتا تەحنيكالىق نوكاۋتپەن قازاقستاندىق سپورتشى جەڭىسكە جەتتى.
– ماڭعىستاۋدىڭ بارلىق تۇرعىندارىنا سالەم جولدايمىن. ءتۋرنيردى تاماشالاۋعا كەلگەن مىڭداعان ادامنىڭ اراسىندا بولعانىما وتە قۋانىشتىمىن. ءدال ءقازىر سىزدەردىڭ ارالارىڭىزدا تۋرنيردەن كەيىن وسى سپورت تۇرىنە قىزىعۋشىلىقپەن كەلەتىن جانە ءوز كۇش-جىگەرىنىڭ ارقاسىندا الداعى 10 جىلدان كەيىن اتى اڭىزعا اينالاتىن جاستار شىعادى دەپ ەسەپتەيمىن. مۇنداي جارىستاردى ءجيى وتكىزىپ، جاستارىمىزدى سپورتقا باۋلۋ كەرەك. قازاقستان - مەنىڭ تۋعان جەرىم، مۇندا ۇلكەن داعىستان دياسپوراسى بار. ماڭعىستاۋلىقتاردىڭ قوناقجايلىعى ءۇشىن العىسىمدى بىلدىرەمىن!، – دەدى ءوز سوزىندە الەم چەمپيونى حابيب نۇرماعامەدوۆ.
سونداي-اق ماڭعىستاۋدا تۇڭعىش رەت ءوتىپ جاتقان حالىقارالىق تۋرنير اياسىندا 11-15 شىلدە ارالىعىندا Naiza Sport Week اپتالىعى ۇيىمداستىرىلدى. وسى ارالىقتا قازاقتىڭ بەلدى چەمپيوندارى، سپورتشىلارى مەن جاتتىقتىرۋشىلارى جاس بۋىنعا ءتۇرلى شەبەرلىك سىنىپتارى، اشىق جاتتىعۋلار مەن موتيۆاسيالىق كەزدەسۋلەر وتكىزدى.
ولاردىڭ قاتارىندا UFC جاۋىنگەرى شاۆكات راحمونوۆ، DAR Team كومانداسىنىڭ كوۋچتارى – ازيز رازىيەۆ پەن ەدۋارد بازروۆ، Naiza ليگاسىنىڭ چەمپيوندارى - ءالىبي ىدىرىس، نيكولاي سامۋسيەۆ، يلدار قۇدايبەرگەنوۆ، پانكراتيوننان الەم چەمپيونى مۇراتبەك قاسىمباي، عالىمجان جاسۇلانوۆ بار.
Naiza ليگاسىنىڭ اپتالىعىن وتكىزۋدىڭ نەگىزگى ماقساتى - جاستاردىڭ سپورتقا دەگەن قىزىعۋشىلىعىن ارتتىرۋ. سونداي-اق ماڭعىستاۋ ءوڭىرىنىڭ تۋريستىك الەۋەتىن جاقسارتۋ.
