Ashyq aspan astynda ótken týrnirge 15 myńnan astam kórermen jinaldy. Týrnirge Mańǵystaý oblysynyń ákimi Nurlan Noǵaev, UFC chempiony Habib Nurmaǵamedov, Qazaqstan Respýblikasynyń MMA, pankration jáne greppling aralas jekpe-jek federatsiiasynyń prezidenti, QR eńbek sińirgen jattyqtyrýshysy Saǵyndyq Mekeev, Naiza Ligasynyń prezidenti Nurbek Qarabala, EAGLE FC Ligasynyń prezidenti Shamil Zavýrov, UFC jaýyngeri Shavhat Rahmonov qatysty.
Nurlan Noǵaev quttyqtaý sózinde salaýatty ómir saltyn nasihattaý maqsatynda ótkizilip jatqan halyqaralyq týrnirdiń mańyzdylyǵyn atap ótti.
– Qazaqstan prezidenti Qasym-Jomart Toqaevtyń tapsyrmasy boiynsha memlekettik organdar jastar men jasóspirimder arasynda buqaralyq sport túrlerin damytý, sportpen ainalysatyn azamattar sanyn arttyrý boiynsha turaqty júieli jumys júrgizýde. Bizdiń elimizdiń namysyn qorǵaityn jáne kóptegen jas býynǵa úlgi bolatyn barlyq uiymdastyrýshylarǵa, qatysýshylar men jaýyngerlerge alǵysymdy bildirgim keledi. Bul týrnirdi Aqtaýda ótkizý Habib Nurmaǵamedovtyń ákesi, marqum Abdýlmanap Nurmaǵamedovtyń ideiasy edi, ókinishke orai ol qazir bizdiń aramyzda joq, biraq izbasarlary onyń isin jalǵastyrýda, – dep atap ótti ákim Nurlan Noǵaev.
Týrnirge álemniń jeti elinen 32 sportshy qatysyp, 16 jekpe-jek ótkizdi.
"Naiza" jáne "EAGLE FC" birlesken týrniriniń basty jekpe-jeginde reseilik Gamzat Hiramagomedov pen qazaqstandyq sportshy Dáýren Ermekov "EAGLE FC" beldigi úshin kezdesý ótkizdi. Ekinshi raýndta tehnikalyq nokaýtpen qazaqstandyq sportshy jeńiske jetti.
– Mańǵystaýdyń barlyq turǵyndaryna sálem joldaimyn. Týrnirdi tamashalaýǵa kelgen myńdaǵan adamnyń arasynda bolǵanyma óte qýanyshtymyn. Dál qazir sizderdiń aralaryńyzda týrnirden keiin osy sport túrine qyzyǵýshylyqpen keletin jáne óz kúsh-jigeriniń arqasynda aldaǵy 10 jyldan keiin aty ańyzǵa ainalatyn jastar shyǵady dep esepteimin. Mundai jarystardy jii ótkizip, jastarymyzdy sportqa baýlý kerek. Qazaqstan - meniń týǵan jerim, munda úlken Daǵystan diasporasy bar. Mańǵystaýlyqtardyń qonaqjailyǵy úshin alǵysymdy bildiremin!, – dedi óz sózinde álem chempiony Habib Nurmaǵamedov.
Sondai-aq Mańǵystaýda tuńǵysh ret ótip jatqan halyqaralyq týrnir aiasynda 11-15 shilde aralyǵynda Naiza Sport Week aptalyǵy uiymdastyryldy. Osy aralyqta qazaqtyń beldi chempiondary, sportshylary men jattyqtyrýshylary jas býynǵa túrli sheberlik synyptary, ashyq jattyǵýlar men motivatsiialyq kezdesýler ótkizdi.
Olardyń qatarynda UFC jaýyngeri Shavkat Rahmonov, DAR Team komandasynyń koýchtary – Aziz Razyev pen Edýard Bazrov, Naiza ligasynyń chempiondary - Əlibi Ydyrys, Nikolai Samýsev, Ildar Qudaibergenov, pankrationnan əlem chempiony Muratbek Qasymbai, Ǵalymjan Jasulanov bar.
Naiza ligasynyń aptalyǵyn ótkizýdiń negizgi maqsaty - jastardyń sportqa degen qyzyǵýshylyǵyn arttyrý. Sondai-aq Mańǵystaý óńiriniń týristik áleýetin jaqsartý.
