اقتاۋدا ەكى ەر ادام پوشتا بولىمشەسىنەن ەسىرتكى سالىنعان سالەمدەمەنى الىپ، پوليسيادان قاشۋعا ارەكەتتەندى، دەپ حابارلايدى Dalanews.kz.
الدىن الا مالىمەتكە سايكەس، كۇدىكتىلەر "قازپوشتا" بولىمشەسىنەن پوشتالىق سالەمدەمەنى العان ساتتەن كەيىن ءتارتىپ ساقشىلارىنىڭ توقتاۋ تۋرالى تالابىن ەلەمەي، اۆتوكولىكپەن قاشىپ كەتكەن.
قۋعىن كەزىندە ولار سالەمدەمەنى جول بويىنا لاقتىرىپ جىبەرگەن. الايدا قاشۋ ءساتسىز اياقتالىپ، جول-كولىك وقيعاسى بولدى. وسىدان كەيىن كۇدىكتىلەر كولىكتى تاستاپ، جاياۋ قاشپاق بولعانىمەن، ەكەۋى دە قولعا ءتۇستى.
ساراپتاما قورىتىندىسى بويىنشا، لاقتىرىلىپ كەتكەن پوشتالىق سالەمدەمەنىڭ ىشىندە جالپى سالماعى شامامەن 400 گرامم گەروين بولعانى انىقتالدى.
اتالعان دەرەك بويىنشا ەسىرتكى قۇرالدارىن زاڭسىز تاسىمالداۋ فاكتىسىمەن قىلمىستىق ءىس قوزعالدى.
مەديسينالىق كۋالاندىرۋ ناتيجەسىندە ۇستالعانداردىڭ قانىندا ەسىرتكى زاتتارى بار ەكەنى راستالدى. سوت شەشىمىمەن كولىك جۇرگىزۋشىسىنە ەسىرتكىلىك ماس كۇيدە كولىك باسقارعانى ءۇشىن اكىمشىلىك جاۋاپكەرشىلىك تاعايىندالىپ، اۆتوكولىك ارنايى ايىپتۇراققا قويىلدى.
سونداي-اق، ەكى ازامات تا ەسىرتكىنى مەديسينالىق ماقساتسىز تۇتىنعانى ءۇشىن ارنايى قابىلداۋ ورنىنا قامالدى.
