استانا اۋەجايىنداعى مەتەوجاعداي كۇردەلى. مۇزدى جاڭبىردىڭ سالدارىنان ءبىرقاتار رەيس كەشىگىپ، كەيبىرى توقتاتىلدى، دەپ حابارلايدى Dalanews.kz.
«اۋەجاي اۋماعىندا مۇزدى جاڭبىر جاۋىپ جاتىر. اۋەجاي مەن بارلىق قىزمەتتەر كۇشەيتىلگەن رەجيمدە جۇمىس ىستەپ، ۇشۋ قاۋىپسىزدىگىن قامتاماسىز ەتۋ ءۇشىن بارلىق قاجەتتى شارالاردى قابىلداۋدا»، – دەپ حابارلادى نۇرسۇلتان نازاربايەۆ حالىقارالىق اۋەجايىنىڭ باسپا ءسوز قىزمەتى.
اۋەجاي مالىمەتىنشە، كەلۋ باعىتى بويىنشا 11 رەيس كەشىگىپ، ءبىر رەيس توقتاتىلعان. ۇشىپ شىعۋ باعىتىندا ءتورت رەيس كەيىنگە شەگەرىلگەن. كەستەدەگى وزگەرىستەردىڭ نەگىزگى سەبەبى – اۋا رايىنا بايلانىستى اۋە كەمەلەرىنىڭ كەش كەلۋى.
«جولاۋشىلاردان ونلاين-تابلونى، اۋەكومپانيالاردىڭ حابارلامالارىن جانە تەرمينالداعى اقپاراتتى باقىلاپ وتىرۋدى سۇرايمىز. تۇسىنىستىك تانىتقاندارىڭىز ءۇشىن العىس ايتامىز»، – دەپ مالىمدەدى اۋەجاي وكىلدەرى.
