ماڭعىستاۋ وبلىسىنىڭ جاڭاوزەن قالاسىندا بۇرىن ءماجىلىس دەپۋتاتتىعىنا كانديدات بولعان، «وزەنمۇنايگاز» كومپانياسىنىڭ بەلسەندىسى مۇراتباي جۇماعالييەۆ سوققىعا جىعىلدى، دەپ حابارلايدى Dalanews.kz.
تەلەگرامداعى مالىمەت بويىنشا، وقيعا 28 جەلتوقسانعا قاراعان ءتۇنى بولعان. ماڭعىستاۋ وبلىستىق دەنساۋلىق ساقتاۋ باسقارماسىنىڭ مالىمەتىنشە، سول كۇنى تاڭعى ساعات 04:10-دا مۇراتباي جۇماعالييەۆ اۋىر حالدە جاڭاوزەن قالالىق اۋرۋحاناسىنا جەتكىزىلگەن.
دارىگەرلەر وعان جابىق باس-مي جاراقاتى، ميدىڭ شايقالۋى، ماڭداي جانە بەت تۇسىندا ەكى جاقتى كوپتەگەن سىرىلۋ جاراقاتتارى دەگەن الدىن الا دياگنوز قويعان. جاعدايىنىڭ اۋىرلىعىنا بايلانىستى ناۋقاس بىردەن جانساقتاۋ بولىمىنە جاتقىزىلعان. كەيىن ول تراۆماتولوگيا جانە نەيروحيرۋرگيا بولىمشەسىنە اۋىستىرىلدى. قازىرگى ۋاقىتتا ونىڭ ومىرىنە ءقاۋىپ ءتونىپ تۇرعان جوق.
اتالعان دەرەك بويىنشا پوليسيا قىلمىستىق ءىس قوزعادى. تەرگەۋ بارىسىندا مۇراتباي جۇماعالييەۆتى ءوز تۋىسى سوققىعا جىققانى انىقتالعان.
ماڭعىستاۋ وبلىستىق پوليسيا دەپارتامەنتىنىڭ حابارلاۋىنشا، وقيعا تۇنگى ۋاقىتتا جاڭاوزەن قالاسىنداعى جەكە تۇرعىن ۇيلەردىڭ بىرىندە ەر ادام مەن ونىڭ جيەنى بىرگە الكوگولدىك ىشىمدىك ءىشىپ وتىرعان كەزدە بولعان. تاراپتار اراسىندا تۇرمىستىق جانجال تۋىنداپ، سوڭى توبەلەسكە ۇلاسقان. سونىڭ سالدارىنان جابىرلەنۋشى ءتۇرلى دەنە جاراقاتىن الىپ، اۋرۋحاناعا جەتكىزىلگەن.
پوليسيا وكىلدەرى الكوگولدى شامادان تىس تۇتىنۋ، اگرەسسيا تانىتۋ جانە تۇرمىستىق داۋلاردى كۇش قولدانۋ ارقىلى شەشۋگە تىرىسۋدىڭ قوعامعا ءقاۋىپتى ەكەنىن اتاپ ءوتتى. قۇقىق قورعاۋ ورگاندارى مۇنداي ارەكەتتەر ءۇشىن تۋىستىق بايلانىسقا قاراماستان، زاڭ اياسىندا جاۋاپكەرشىلىك كوزدەلەتىنىن ەسكەرتتى.
ايتا كەتەيىك، مۇراتباي جۇماعالييەۆ جاڭاوزەن مۇنايشىلارىنىڭ نارازىلىق اكسيالارىن بىرنەشە رەت ۇيىمداستىرعان بەلسەندى رەتىندە بەلگىلى. 2023 جىلى ول ءبىر مانداتتىق وكرۋگ بويىنشا ءماجىلىس دەپۋتاتتىعىنا كانديدات بولىپ ءتۇسىپ، سايلاۋدا ەدىل جاڭبىرشينگە جول بەرگەن.
