Mańǵystaý oblysynyń Jańaózen qalasynda buryn Májilis depýtattyǵyna kandidat bolǵan, «Ózenmunaigaz» kompaniiasynyń belsendisi Muratbai Jumaǵaliev soqqyǵa jyǵyldy, dep habarlaidy Dalanews.kz.
Telegramdaǵy málimet boiynsha, oqiǵa 28 jeltoqsanǵa qaraǵan túni bolǵan. Mańǵystaý oblystyq densaýlyq saqtaý basqarmasynyń málimetinshe, sol kúni tańǵy saǵat 04:10-da Muratbai Jumaǵaliev aýyr hálde Jańaózen qalalyq aýrýhanasyna jetkizilgen.
Dárigerler oǵan jabyq bas-mi jaraqaty, midyń shaiqalýy, mańdai jáne bet tusynda eki jaqty kóptegen syrylý jaraqattary degen aldyn ala diagnoz qoiǵan. Jaǵdaiynyń aýyrlyǵyna bailanysty naýqas birden jansaqtaý bólimine jatqyzylǵan. Keiin ol travmatologiia jáne neirohirýrgiia bólimshesine aýystyryldy. Qazirgi ýaqytta onyń ómirine qaýip tónip turǵan joq.
Atalǵan derek boiynsha politsiia qylmystyq is qozǵady. Tergeý barysynda Muratbai Jumaǵalievti óz týysy soqqyǵa jyqqany anyqtalǵan.
Mańǵystaý oblystyq politsiia departamentiniń habarlaýynsha, oqiǵa túngi ýaqytta Jańaózen qalasyndaǵy jeke turǵyn úilerdiń birinde er adam men onyń jieni birge alkogoldik ishimdik iship otyrǵan kezde bolǵan. Taraptar arasynda turmystyq janjal týyndap, sońy tóbeleske ulasqan. Sonyń saldarynan jábirlenýshi túrli dene jaraqatyn alyp, aýrýhanaǵa jetkizilgen.
Politsiia ókilderi alkogoldi shamadan tys tutyný, agressiia tanytý jáne turmystyq daýlardy kúsh qoldaný arqyly sheshýge tyrysýdyń qoǵamǵa qaýipti ekenin atap ótti. Quqyq qorǵaý organdary mundai áreketter úshin týystyq bailanysqa qaramastan, zań aiasynda jaýapkershilik kózdeletinin eskertti.
Aita keteiik, Muratbai Jumaǵaliev Jańaózen munaishylarynyń narazylyq aktsiialaryn birneshe ret uiymdastyrǵan belsendi retinde belgili. 2023 jyly ol bir mandattyq okrýg boiynsha Májilis depýtattyǵyna kandidat bolyp túsip, sailaýda Edil Jańbyrshinge jol bergen.
