امەريكا قۇراما شتاتتارىنىڭ سەناتى ۋكرايناعا ەسكەري قولداۋ كٶرسەتۋ ماقساتىندا 1 ميلليارد دوللار كٶلەمٸندە قارجى بٶلۋ تۋرالى قۇجاتتى ماقۇلدادى. سەناتتىڭ اسسيگناتسييالار جٶنٸندەگٸ كوميتەتٸ دايىنداعان قۇجاتتى قولداپ, 26 سەناتور داۋىس بەرسە, تەك ٷشەۋٸ عانا قارسى شىققان. بۇل تۋرالى Reuters اگەنتتٸگٸ حابارلادى, دەپ جازادى Dalanews.kz.
سەنات ماقۇلداعان قۇجاتقا سەيكەس, ۋكراينا قاۋٸپسٸزدٸگٸن قولداۋ باعدارلاماسى (USAI) اياسىندا قارۋ-جاراق ساتىپ الۋعا 800 ميلليون دوللار باعىتتالماق. قوسىمشا تاعى 225 ميلليون دوللار بالتىق ەلدەرٸنە بەرٸلەدٸ, دەگەنمەن ونىڭ باسىم بٶلٸگٸ دە ۋكراينانى رەسەي اگرەسسيياسىنان قورعاۋعا جۇمسالادى.
"جالپى العاندا, ۋكرايناعا بٶلٸنەتٸن ەسكەري قولداۋ 1 ميلليارد دوللاردى قۇرايدى", دەپ مەلٸمدەدٸ دەموكرات سەناتور كريس كۋنس.
اتالعان قۇجاتقا قاتىستى تٷسٸنٸكتەمە بەرگەن سەناتتىڭ قورعانىس جٶنٸندەگٸ كٸشٸ كوميتەتٸنٸڭ باسشىسى, رەسپۋبليكالىق سەناتور ميتچ ماككوننەلل بۇل شەشٸمنٸڭ ماڭىزدىلىعىن بىلاي اتاپ ٶتەدٸ:
"تەك الدىڭعى ەكٸمشٸلٸك قانا ەمەس, قازٸرگٸ ەكٸمشٸلٸك تە رەسەي تاراپىنان تٶنٸپ تۇرعان قاۋٸپ-قاتەر دەڭگەيٸن تولىق باعالامادى", – دەدٸ ماككوننەلل.
ايتا كەتەرلٸگٸ, اقش پرەزيدەنتٸ دونالد ترامپتىڭ ەكٸمشٸلٸگٸ باستاپقىدا ۋكرايناعا قارجى بٶلۋدٸ بيۋدجەتتە قاراستىرماعان بولاتىن.
ترامپ پۋتينگە ۋلتيماتۋم قويدى
29 شٸلدەدە دونالد ترامپ رەسەي پرەزيدەنتٸ ۆلاديمير پۋتينگە ۋكرايناداعى سوعىستى توقتاتۋعا 10 كٷن ۋاقىت بەردٸ. ول بەيبٸت كەلٸسٸمگە 8 تامىزعا دەيٸن قول جەتكٸزۋ كەرەكتٸگٸن اتاپ ٶتتٸ. ەگەر وسى مەرزٸم ٸشٸندە نەتيجە بولماسا, اقش مەسكەۋگە قارسى جاڭا سانكتسييالار مەن قوسىمشا شارالار قابىلدايتىنىن ەسكەرتتٸ. بۇعان دەيٸنگٸ ۇسىنىلعان شارالاردىڭ بٸرٸ – رەسەي مۇنايىن ساتىپ الۋشى ەلدەرگە 100 پايىزدىق باج سالىعىن ەنگٸزۋ بولاتىن. باستاپقىدا پۋتينگە بەرٸلگەن ۋاقىت 50 كٷن بولسا, ترامپ رەسەيلٸك ەرٸپتەسٸنە كٶڭٸلٸ تولماي, بۇل مەرزٸمدٸ كٷرت قىسقارتقان.
ترامپ ۋكرايناعا قوسىمشا ەسكەري كٶمەك بەرۋگە ۋەدە ەتكەنٸمەن, قارۋ-جاراق جەتكٸزۋ ناتو ەلدەرٸ تاراپىنان قارجىلاندىرىلۋى تيٸس دەپ مەلٸمدەدٸ. قازٸر اقش ۋكرايناعا قوسىمشا Patriot زەنيتتٸك-زىمىران كەشەندەرٸن بەرۋ جوسپارى بارىن العا تارتادى. بۇل باستامانى گەرمانييا قولداپ, بەس Patriot جٷيەسٸن ساتىپ الۋعا دايىن ەكەندٸگٸن بٸلدٸرگەن. فرانتسييا, يتالييا جەنە چەحييا بولسا, مۇنداي باستامادان باس تارتقان. ۇلىبريتانييا, ەزٸرگە تٷپكٸلٸكتٸ شەشٸم قابىلداعان جوق.
وسىعان دەيٸن, 23 شٸلدەدە اقش مەملەكەتتٸك دەپارتامەنتٸ ۋكرايناعا 322 ميلليون دوللار تۇراتىن قارۋ-جاراق ساتۋ كەلٸسٸمٸن ماقۇلداعان ەدٸ. بٸرٸنشٸ پاكەتكە Hawk Phase III ەۋە قورعانىس جٷيەلەرٸ مەن ولاردىڭ قىزمەت كٶرسەتۋٸ كٸرسە, ەكٸنشٸ پاكەتكە Bradley جاۋىنگەرلٸك ماشينالارى جەنە ولاردى جٶندەۋ قىزمەتٸ ەنگٸزٸلگەن. بۇدان بٶلەك, امەريكالىق Raytheon Technologies كومپانيياسى ۋكراينا ٷشٸن AMRAAM زىمىراندارىن ٶندٸرۋ تۋرالى كەلٸسٸمگە قول قويدى.
جالپى ماقۇلدانعان قورعانىس بيۋدجەتٸنٸڭ كٶلەمٸ 852 ميلليارد دوللاردى قۇرايدى. بۇل - ٶتكەن جىلمەن سالىستىرعاندا 2,6 پايىزعا, ياعني 21,7 ميلليارد دوللارعا ارتىق كٶلەم. بيۋدجەت سەنات پەن ٶكٸلدەر پالاتاسىنا داۋىسقا سالۋعا بەرٸلٸپ, پرەزيدەنت دونالد ترامپ قول قويعان سوڭ كٷشٸنە ەنەدٸ.
