Amerika Qurama Shtattarynyń Senaty Ýkrainaǵa áskeri qoldaý kórsetý maqsatynda 1 milliard dollar kóleminde qarjy bólý týraly qujatty maquldady. Senattyń assignatsiialar jónindegi komiteti daiyndaǵan qujatty qoldap, 26 senator daýys berse, tek úsheýi ǵana qarsy shyqqan. Bul týraly Reuters agenttigi habarlady, dep jazady Dalanews.kz.
Senat maquldaǵan qujatqa sáikes, Ýkraina qaýipsizdigin qoldaý baǵdarlamasy (USAI) aiasynda qarý-jaraq satyp alýǵa 800 million dollar baǵyttalmaq. Qosymsha taǵy 225 million dollar Baltyq elderine beriledi, degenmen onyń basym bóligi de Ýkrainany Resei agressiiasynan qorǵaýǵa jumsalady.
"Jalpy alǵanda, Ýkrainaǵa bólinetin áskeri qoldaý 1 milliard dollardy quraidy", dep málimdedi demokrat senator Kris Kýns.
Atalǵan qujatqa qatysty túsinikteme bergen Senattyń qorǵanys jónindegi kishi komitetiniń basshysy, respýblikalyq senator Mitch Makkonnell bul sheshimniń mańyzdylyǵyn bylai atap ótedi:
"Tek aldyńǵy ákimshilik qana emes, qazirgi ákimshilik te Resei tarapynan tónip turǵan qaýip-qater deńgeiin tolyq baǵalamady", – dedi Makkonnell.
Aita keterligi, AQSh prezidenti Donald Tramptyń ákimshiligi bastapqyda Ýkrainaǵa qarjy bólýdi biýdjette qarastyrmaǵan bolatyn.
Tramp Pýtinge ýltimatým qoidy
29 shildede Donald Tramp Resei prezidenti Vladimir Pýtinge Ýkrainadaǵy soǵysty toqtatýǵa 10 kún ýaqyt berdi. Ol beibit kelisimge 8 tamyzǵa deiin qol jetkizý kerektigin atap ótti. Eger osy merzim ishinde nátije bolmasa, AQSh Máskeýge qarsy jańa sanktsiialar men qosymsha sharalar qabyldaitynyn eskertti. Buǵan deiingi usynylǵan sharalardyń biri – Resei munaiyn satyp alýshy elderge 100 paiyzdyq baj salyǵyn engizý bolatyn. Bastapqyda Pýtinge berilgen ýaqyt 50 kún bolsa, Tramp reseilik áriptesine kóńili tolmai, bul merzimdi kúrt qysqartqan.
Tramp Ýkrainaǵa qosymsha áskeri kómek berýge ýáde etkenimen, qarý-jaraq jetkizý NATO elderi tarapynan qarjylandyrylýy tiis dep málimdedi. Qazir AQSh Ýkrainaǵa qosymsha Patriot zenittik-zymyran keshenderin berý jospary baryn alǵa tartady. Bul bastamany Germaniia qoldap, bes Patriot júiesin satyp alýǵa daiyn ekendigin bildirgen. Frantsiia, Italiia jáne Chehiia bolsa, mundai bastamadan bas tartqan. Ulybritaniia, ázirge túpkilikti sheshim qabyldaǵan joq.
Osyǵan deiin, 23 shildede AQSh Memlekettik departamenti Ýkrainaǵa 322 million dollar turatyn qarý-jaraq satý kelisimin maquldaǵan edi. Birinshi paketke Hawk Phase III áýe qorǵanys júieleri men olardyń qyzmet kórsetýi kirse, ekinshi paketke Bradley jaýyngerlik mashinalary jáne olardy jóndeý qyzmeti engizilgen. Budan bólek, amerikalyq Raytheon Technologies kompaniiasy Ýkraina úshin AMRAAM zymyrandaryn óndirý týraly kelisimge qol qoidy.
Jalpy maquldanǵan qorǵanys biýdjetiniń kólemi 852 milliard dollardy quraidy. Bul - ótken jylmen salystyrǵanda 2,6 paiyzǵa, iaǵni 21,7 milliard dollarǵa artyq kólem. Biýdjet Senat pen Ókilder palatasyna daýysqa salýǵa berilip, prezident Donald Tramp qol qoiǵan soń kúshine enedi.
