باتىس قازاقستان وبلىسىنىڭ اقجايىق اۋىلىندا اقىن اقۇشتاپ باقتىگەرەيەۆانىڭ 80 جاسقا تولۋىنا وراي ەسىگىن ايقارا اشقان ادەبيەتشىلەر ۇيىندە ءوڭىرىمىزدىڭ قالامگەرلەرى باس قوستى.
جىلى جۇزدەسۋدى قازاقستان جازۋشىلار وداعى باتىس قازاقستان وبلىسى فيليالىنىڭ ءتوراعاسى، وبلىستىق "ورال ءوڭىرى" گازەتىنىڭ باس رەداكتورى، ۇلتتىق قۇرىلتايدىڭ مۇشەسى باۋىرجان عۇبايدۋللين تىزگىندەدى. ورتادان تەرەكتى اۋدانىنىڭ اكىمى ءاليا مۇحانبەتجانوۆا، اۋداندىق ءماسليحات ءتوراعاسى ءالجان نۇرعالييەۆ تابىلدى.
ادەبيەتشىلەر ءۇيىنىڭ اشىلۋ سالتاناتىنا قاتىسقان اقىن-جازۋشىلار رۋحاني وشاقتىڭ جۇمىسىنا ساتتىلىك تىلەدى. قالامگەرلەر شىعارماشىلىق جونىندە وي تارقاتتى. جۇزدەسۋ بارىسىندا قازاقتىڭ اياۋلى اقىن قىزىنا جەرگىلىكتى اقىن ساعىنتاي بيسەنعالييەۆ ولەڭىن وقىسا، جاس ايتىسكەر ءادىل احمەتوۆ ارناۋ ايتتى.
"AQJAIYQ" تەلەارناسىنىڭ ديرەكتورى كلارا قامبەتوۆا ارنانىڭ 60 جىلدىق مەرەيتويىنا ارنالعان مەرەكەلىك مەدالدى اقۇشتاپ باقتىگەرەيقىزىنا تابىستادى.
سودان سوڭ اقىننىڭ 80 جاسىنا وراي تۇسىرىلگەن باعدارلامادان ءۇزىندى كورسەتىلدى.
–بۇگىنگى اشىلىپ وتىرعان ادەبيەتشىلەر ءۇيى قازاق ادەبيەتىنىڭ وركەندەۋىنە زور ۇلەس قوسادى دەگەن ويدامىن. تامىرى تەرەڭ، توپىراعى قۇنارلى، شەجىرەسى كوپ ولكەنىڭ تاريحى، رۋحانياتى تۇگەندەلە بەرسىن،- دەدى "الاش" سىيلىعىنىڭ يەگەرى، بەلگىلى جۋرناليست قازىبەك قۇتتىمۇرات ۇلى اشىلۋ سالتاناتىندا سويلەگەن سوزىندە.
–تەرەكتى توپىراعى تۇنعان تاريح. سونى زەرتتەۋ كەرەك، زەردەلەۋ كەرەك. جاس زەرتتەۋشىلەرگە قولداۋ تابىلعانى ءجون، - دەپ كەشتى تۇيىندەدى «اقجايىقتىڭ اق شاعالاسى» اتانعان اقىن اقۇشتاپ باقتىگەرەي قىزى.
