ساپار بارىسىندا اماندىق باتالوۆ ەڭ الدىمەن ەسىك توپتىق سۋ تاراتقىشى قۇرىلىسىنىڭ بارىسىمەن تانىستى.
وبلىستىق ەنەرگەتيكا جانە تۇكش باسقارماسىنىڭ باسشىسى باعلان تانەكەنوۆتىڭ ايتۋىنشا، جوبانىڭ جالپى قۇنى 4،4 ملرد تەڭگە. ونى جۇزەگە اسىرۋ 9 ەلدى مەكەنگە، اتاپ ايتقاندا، ەسىك قالاسىنا، بولەك، ايمەن، قىزىلجار، قاراساي، قاينازار، كوكتوبە، راحات، ورىكتى اۋىلدارىنا. اۋىز سۋدى ساپالى جانە ۇزدىكسىز بەرۋدى قامتاماسىز ەتەدى. جوبادا تاۋلىگى قۋاتىنا 30 936 تەكشە مەتر بولاتىن سۇزگى ستانساسىنىڭ، كولەمى 1400 تەكشە مەترلىك 2 رەزەرۆۋاردىڭ، ۇزىندىعى 40،2 كم سۋ تاراتقىشتىڭ قۇرىلىسى قاراستىرىلعان. بۇگىنگى كۇنى نىسان 60% دايىن. جۇمىستار 2022 جىلدىڭ مامىرىندا اياقتالادى دەپ جوسپارلانعان.
اماندىق باتالوۆ وسى كۇنى بولەك اۋىلدىق وكرۋگىندە ايمەن اۋىلىندا ورتا مەكتەپكە جاسالعان كۇردەلى جوندەۋ جۇمىستارىمەن، «جۇمىسپەن قامتۋ جول كارتاسى» باعدارلاماسىنىڭ شەڭبەرىندە اتقارىلعان ىستەرمەن تانىستى.
سول سياقتى وبلىستىق ەنەرگەتيكا جانە تۇكش باسقارماسىنا تۇرگەن اۋىلىندا اۋىز سۋدىڭ ۇزىلىسپەن بەرىلۋ سەبەبىن انىقتاۋ تاپسىرىلدى. بۇل ماسەلەنى وبلىس اكىمىنە جەرگىلىكتى تۇرعىن حابارلاما جازۋ ارقىلى جەتكىزگەن.
مۇنان سوڭ ءوڭىر باسشىسىنىڭ جۇمىس ساپارى تالعار اۋدانىندا جالعاسىپ، وندا ا.باتالوۆ تالعار قالاسىنداعى اۋلالاردى اباتتاندىرۋ جۇمىسىمەن تانىستى.
وبلىس اكىمىنىڭ تاپسىرماسى بويىنشا بلوكتى-مودۋلدى قازاندىقتار ورناتۋ اۋلالاردى اباتتاندىرۋمەن قاتار جۇرگىزىلۋدە. اۋلا ىشىلىك الاڭداردى اباتتاندىرۋ جوبالارىن ىسكە اسىرۋعا 1 ملرد 311 ملن تەڭگە بولىنگەن. بارلىعى 123 كوپ پاتەرلى ءۇيى بار 70 اۋلا اباتتاندىرىلادى. «جۇمىسپەن قامتۋ جول كارتاسى» اياسىندا قۇرىلىس جۇمىستارىنا 200-دەي ادام تارتىلعان.
وبلىس اكىمى تالعار قالاسى اباي كوشەسىندەگى № 87 ءۇيدىڭ اۋلاسىن بارىپ كوردى. جەرگىلىكتى تۇرعىنداردىڭ ايتۋىنشا، اتقارىلعان جۇمىستاردىڭ ساپاسىنا كوڭىلدەرى تولعان. اتاپ ايتقاندا، ولار بمق-عا قوسقاننان كەيىنگى جىلۋمەن قامتۋ جانە اۋلالاردى كوركەيتۋ ساپاسىنا ريزا.
– ءبىزدىڭ ۇيدە نەگىزىنەن ەگدە ادامدار تۇرادى. ولاردىڭ كوپشىلىگى ءوز پاتەرلەرىن جىلىتۋ ءۇشىن كۇن سايىن جوعارعى قاباتقا كومىر، وتىن تاسىپ، كۇل شىعارۋعا ءماجبۇر بولاتىن. بۇل ۇلكەن ادام تۇرماق جاستاردىڭ وزىنە دە اۋىر. ءقازىر ول قيىنشىلىقتان قۇتىلدىق. پاتەرىمىز ءتىپتى ىستىق دەسەك تە بولادى. اۋلانىڭ دا اجارىن كىرگىزىپ، جاڭا كەلبەتكە كەلتىرىپ قويدى. نەمەرەلەرىمىز ەمىن-ەركىن ويناپ ءجۇر، – دەدى اۋلا تۇرعىندارىنىڭ ءبىرى.
وبلىس اكىمى جوباعا قاسبەتتەر مەن شاتىرلاردى اباتتاندىرۋ جونىندە ۇسىنىستار قوسۋدى تاپسىردى. «سوندا ۇيلەر تۇتاستاي جاڭارىپ، ەستەتيكالىق بەينەسى قالىپتاسادى. ءقازىر اۋلالار رەتكە كەلتىرىلدى. ۇيلەر ورتالىق جىلۋ جۇيەسىنە قوسىلدى. وسىنىڭ ءبارى تۇرعىنداردىڭ ءقاۋىپسىز، جايلى ءومىر سۇرۋىنە مۇمكىندىك بەرەدى. بۇل ەل پرەزيدەنتىنىڭ بەرگەن ماڭىزدى تاپسىرمالاردىڭ ءبىرى» دەپ اتاپ ءوتتى ا. باتالوۆ.
جالپى 2018 جىلدان باستاپ تالعار قالاسىندا 32 بلوكتى-مودۋلدى قازاندىق ورناتىلدى. بۇل 142 كوپ پاتەرلى ءۇيدى نەمەسە 4489 ابونەنتتى گازبەن جىلىتۋ ورتالىق جۇيەسىنە قوسۋعا جاعداي جاسادى. بيىلعى جىلى ەڭبەكشىقازاق، قاراساي، پانفيلوۆ، ۇيعىر اۋداندارىندا مەملەكەتتىك-جەكەمەنشىك ارىپتەستىك اياسىندا 109 كوپ قاباتتى ۇيگە ارناپ 36 بمق سالىنادى. بۇگىنگى كۇنگە ءوڭىر بويىنشا قاراساي جانە تالعار اۋداندارىندا بارلىعى 152 كوپ قاباتتى ءۇي ءۇشىن 35 بمق ورناتىلىپ، بۇل قازاندىقتار پاتەرلەردى ورتالىق جىلۋ جۇيەسىمەن قامتىپ وتىر.
