Sapar barysynda Amandyq Batalov eń aldymen Esik toptyq sý taratqyshy qurylysynyń barysymen tanysty.
Oblystyq energetika jáne TÚKSh basqarmasynyń basshysy Baǵlan Tánekenovtyń aitýynsha, jobanyń jalpy quny 4,4 mlrd teńge. Ony júzege asyrý 9 eldi mekenge, atap aitqanda, Esik qalasyna, Bólek, Áimen, Qyzyljar, Qarasai, Qainazar, Kóktóbe, Rahat, Órikti aýyldaryna. aýyz sýdy sapaly jáne úzdiksiz berýdi qamtamasyz etedi. Jobada táýligi qýatyna 30 936 tekshe metr bolatyn súzgi stansasynyń, kólemi 1400 tekshe metrlik 2 rezervýardyń, uzyndyǵy 40,2 km sý taratqyshtyń qurylysy qarastyrylǵan. Búgingi kúni nysan 60% daiyn. Jumystar 2022 jyldyń mamyrynda aiaqtalady dep josparlanǵan.
Amandyq Batalov osy kúni Bólek aýyldyq okrýginde Áimen aýylynda orta mektepke jasalǵan kúrdeli jóndeý jumystarymen, «Jumyspen qamtý jol kartasy» baǵdarlamasynyń sheńberinde atqarylǵan istermen tanysty.
Sol siiaqty oblystyq energetika jáne TÚKSh basqarmasyna Túrgen aýylynda aýyz sýdyń úzilispen berilý sebebin anyqtaý tapsyryldy. Bul máseleni oblys ákimine jergilikti turǵyn habarlama jazý arqyly jetkizgen.
Munan soń óńir basshysynyń jumys sapary Talǵar aýdanynda jalǵasyp, onda A.Batalov Talǵar qalasyndaǵy aýlalardy abattandyrý jumysymen tanysty.
Oblys ákiminiń tapsyrmasy boiynsha blokty-modýldi qazandyqtar ornatý aýlalardy abattandyrýmen qatar júrgizilýde. Aýla ishilik alańdardy abattandyrý jobalaryn iske asyrýǵa 1 mlrd 311 mln teńge bólingen. Barlyǵy 123 kóp páterli úii bar 70 aýla abattandyrylady. «Jumyspen qamtý jol kartasy» aiasynda qurylys jumystaryna 200-dei adam tartylǵan.
Oblys ákimi Talǵar qalasy Abai kóshesindegi № 87 úidiń aýlasyn baryp kórdi. Jergilikti turǵyndardyń aitýynsha, atqarylǵan jumystardyń sapasyna kóńilderi tolǵan. Atap aitqanda, olar BMQ-ǵa qosqannan keiingi jylýmen qamtý jáne aýlalardy kórkeitý sapasyna riza.
– Bizdiń úide negizinen egde adamdar turady. Olardyń kópshiligi óz páterlerin jylytý úshin kún saiyn joǵarǵy qabatqa kómir, otyn tasyp, kúl shyǵarýǵa májbúr bolatyn. Bul úlken adam turmaq jastardyń ózine de aýyr. Qazir ol qiynshylyqtan qutyldyq. Páterimiz tipti ystyq desek te bolady. Aýlanyń da ajaryn kirgizip, jańa kelbetke keltirip qoidy. Nemerelerimiz emin-erkin oinap júr, – dedi aýla turǵyndarynyń biri.
Oblys ákimi jobaǵa qasbetter men shatyrlardy abattandyrý jóninde usynystar qosýdy tapsyrdy. «Sonda úiler tutastai jańaryp, estetikalyq beinesi qalyptasady. Qazir aýlalar retke keltirildi. Úiler ortalyq jylý júiesine qosyldy. Osynyń bári turǵyndardyń qaýipsiz, jaily ómir súrýine múmkindik beredi. Bul el Prezidentiniń bergen mańyzdy tapsyrmalardyń biri» dep atap ótti A. Batalov.
Jalpy 2018 jyldan bastap Talǵar qalasynda 32 blokty-modýldi qazandyq ornatyldy. Bul 142 kóp páterli úidi nemese 4489 abonentti gazben jylytý ortalyq júiesine qosýǵa jaǵdai jasady. Biylǵy jyly Eńbekshiqazaq, Qarasai, Panfilov, Uiǵyr aýdandarynda memlekettik-jekemenshik áriptestik aiasynda 109 kóp qabatty úige arnap 36 BMQ salynady. Búgingi kúnge óńir boiynsha Qarasai jáne Talǵar aýdandarynda barlyǵy 152 kóp qabatty úi úshin 35 BMQ ornatylyp, bul qazandyqtar páterlerdi ortalyq jylý júiesimen qamtyp otyr.
