قابىلداۋعا جالپى 24 تۇرعىن كەلىپ، ەلدى مەكەندەگى شەشىمىن كۇتكەن ماسەلەلەردى جەتكىزدى. سولاردىڭ ءبىرى زەينەتكەر س.سۇتتىمبەكوۆ اۋىل شارۋاشىلىعىنا قاتىستى سۇراقتارىنا جاۋاپ الىپ قايتتى.
- جالپى ماشات ەلدى مەكەنىندە الەۋمەتتىك ماسەلە ءبىرشاما شەشىلگەن. گازبەن جانە اۋىز سۋمەن قامتۋ، مەديسينالىق كومەك كورسەتۋ، مەكتەپ سالۋ ماسەلەسى وڭ جولعا قويىلعان. دەگەنمەن شەشىلمەگەن ماسەلەلەر دە بار. اۋىل حالقىنىڭ كۇنكورىسى مال شارۋاشىلىعىنا بايلانىستى بولعاندىقتان، جايىلىم جەر جەتىسپەۋشىلىگى تۋىنداپ وتىر. بۇگىن «AMANAT» پارتياسىنىڭ باستاماسىمەن ءوتىپ جاتقان قابىلداۋدا وسى ماسەلەنى ايتتىم، - دەيدى ماشاتتىق ارداگەر.
اۋداندىق اۋىل شارۋاشىلىعى جانە جەر قاتىناستارى ءبولىم باسشىسىنىڭ ورىنباسارى ۋ.بوتبايەۆ اتالعان ماسەلەگە قاتىستى زاڭ اياسىندا تۇسىندىرمە بەردى.
- اۋىل وكرۋگتە 1500 گەكتار كولەمىندە جەر بار. سونىڭ 640 گەكتارى تۇراقتى ورتاق پايدالانۋعا بەرىلگەن. ال 470 گەكتار مەموراندۋم ارقىلى كەدەرگىسىز مال جايۋعا رۇقسات بەرىلدى. ءبىراق قايتارىلاتىن جەرلەر بار. ماسەلەن، بيىل جىلدىڭ اياعىنا دەيىن 300 گەكتار جەردى قايتارۋ جوسپاردا بار. ول بويىنشا ءتيىستى جۇمىستار جۇرگىزىلۋدە، - دەدى جاۋاپتى ءبولىم وكىلى.
جالپى حالىقتىڭ پارتياعا دەگەن سەنىمى ارتقان. وعان سەبەپ كەلىپ تۇسكەن وتىنىشتەردىڭ وڭ شەشىلۋىندە دەپ تۇسىندىرەدى وبلىستىق پارتيا فيليالى اتقارۋشى حاتشىسىنىڭ ورىنباسارى پ.تۇرسىنبايەۆ. ماسەلەن، بيىل قاڭتار-ماۋسىم ايلارىندا ايماقتىق جانە 17 اۋماقتىق پارتيا فيليالىندا 9735 ءوتىنىش تىركەلگەن. ونىڭ 5066-سى وڭتايلى شەشىلسە، 4546 شاعىمعا زاڭ اياسىندا كەڭەستەر مەن تۇسىندىرمەلەر بەرىلگەن. ال قالعان ارىزدار قارالۋ ۇستىندە.
