20 قاڭتاردا الەمدىك ۆاليۋتا رەزەرۆتەرىندەگى اقش دوللارىنىڭ ۇلەسى 40 پايىزدان تومەن ءتۇسىپ كەتتى. كەلەسى كۇنى التىننىڭ ۇلەسى 30 پايىزدان اسىپ، جاھاندىق رەزەرۆتەر قۇرىلىمىندا ايتارلىقتاي وزگەرىس بايقالدى، دەپ حابارلايدى Dalanews.kz.
سوڭعى رەت دوللاردىڭ ۇلەسى 40 پايىزدان تومەن دەڭگەيگە 1995 جىلعى 29 ماۋسىمدا تۇسكەن. ساراپشىلار بۇل ءبىر رەتتىك قۇبىلىس ەمەس، اكتيۆتەر قۇرىلىمىنداعى تاريحي بەتبۇرىس ەكەنىن ايتادى.
اسىرەسە، مەملەكەتتىك قارىز ءوسۋى، گەوساياسي ءبولىنىس كۇشەيۋى جانە رەزەرۆتەر تۇراقتىلىعىنا سۇرانىس ارتۋى سەكىلدى جاعدايلاردا التىنعا قىزىعۋشىلىق كۇشەيىپ وتىر.
قازىرگى ءۇردىس ساقتالسا، التىن رەزەرۆتەرى جىلدىق ەسەپتە اي سايىن ورتا ەسەپپەن 8،4 پايىزعا ءوسىپ، ال دوللار ۇلەسى 6،1 پايىزعا قىسقارۋى مۇمكىن. وسى قارقىن جالعاسسا جانە قازىرگى باعالار وزگەرمەسە، 2026 جىلدىڭ سوڭىنا قاراي التىن دوللاردى باسىپ وزىپ، ەڭ ءىرى اكتيۆكە اينالۋى ىقتيمال.
قازاقستاننىڭ التىن-ۆاليۋتا رەزەرۆتەرى دە وسىعان ۇقساس باعىتتى كورسەتەدى. 2024 جىلعى جەلتوقساندا ەركىن ايىرباستالاتىن ۆاليۋتالارداعى اكتيۆتەر ۇلەسى 47،97 پايىز بولسا، التىن 52،03 پايىز بولعان. ال 2025 جىلعى جەلتوقساندا ۆاليۋتالىق اكتيۆتەر 27،79 پايىزعا دەيىن تومەندەپ، التىن ۇلەسى 72،21 پايىزعا دەيىن وسكەن.
