الماتى وبلىسىنا قاراستى ەڭبەكشىقازاق اۋدانىنىڭ مادەنيەت ۇيىندەگى № 123 سايلاۋ ۋچاسكەسىندە التىن ادام بەينەسىندە كيىنگەن ازامات رەفرەندۋمعا قاتىسىپ، داۋىس بەردى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
التىن ادام كەيپىندە كەلىپ داۋىس بەرگەن اۋدانداعى بەلسەندى ازامات – جاسۇلان سەيدازيموۆ.
قازاقستان ارحەولوگياسىنىڭ تاريحىندا كوپتەگەن تاڭعاجايىپ مۇرا بار، ولاردىڭ ءبىرى – الماتى وبلىسىندا تابىلعان «التىن ادام».
ال ەڭبەكشىقازاق اۋدانى سول التىن ادامنىڭ اتامەكەنى.
– بۇگىن ەلىمىزدە تاريحي شەشىم قابىلدانىپ جاتىر. بۇل ارينە بارلىعىمىزدىڭ بولاشاعىمىزعا قاتىستى ماڭىزدى شەشىم. سوندىقتان بۇل كەلەلى شەشىمدە تۋعان توپىراعىمىزدىڭ وتكەن تاريحى مەن ونداعى وركەنيەت ءىزىن جاڭعىرتقىم كەلدى. ارينە، مەن بۇنى وزدىك ازاماتتىق ۇستانىم ءبىلدىرۋدىڭ ەرەكشە ءتاسىلى دەر ەدىم. مەن قاشاندا قوعامدى وزگەرتۋ مەن ەلىمىزدى وركەندەتۋگە باعىتتالعان شەشىمدەرگە بەلسەنە ءۇن قاتىپ كەلەمىن، – دەيدى كاسىپكەر جاسۇلان سەيدازيموۆ.
