شاعىن جانە ورتا بيزنەستى دامىتۋعا ەل باسشىلىعى ەرەكشە كوڭىل بولەدى. قاتتى تۇرمىستىق قالدىقتاردى قايتا وڭدەۋ، «جاسىل» تەحنولوگيالاردى پايدالانۋ، قۇرىلىس ماتەريالدارىن ءوندىرۋ ءۇشىن بازالار سالۋ، ماشينالارعا ارنالعان تۇراق كەڭىستىگىن كەڭەيتۋ، تۇرعىن ءۇيدى بيزنەسكە اينالدىرۋ سىندى ماسەلەلەر كوتەرىلدى.
اكىمدىك پەن قۇرىلىمدىق بولىمشەلەر ءاربىر ماسەلەنى ەگجەي-تەگجەيلى زەرتتەيتىن بولادى. قالا اكىمى التاي كولگىنوۆ بۇل الاڭ – قۇر ءسوزدىڭ ەمەس، ناقتى ءىستىڭ الاڭى ەكەندىگىن ايتتى. كاسىپكەرلەرمەن كەزدەسۋلەر تۇراقتى تۇردە وتكىزىلمەكشى.
IQala ءبىرىڭعاي قالالىق قىزمەتتەر ورتالىعى كاسىپكەرلەرگە «ءبىر تەرەزە» قاعيداتى بويىنشا 90-نان استام قىزمەت كورسەتەدى. جىل سوڭىنا دەيىن قىزمەت تۇرلەرىن 139-عا دەيىن ارتتىرۋ جوسپارلانۋدا.
قازىرگى تاڭدا كاسىپكەرلەر ەلەكتر قۋاتى، جىلۋ مەن سۋ، قوقىس شىعارۋ سىندى ماسەلەلەر بويىنشا شوتتاردى ءبىر جەردە تولەي الادى. سيفرلاندىرۋعا كوشۋ اياسىندا قىزمەتتەردى ونلاين رەجيمدە iQala ارنايى ينتەرنەت-پورتالى ارقىلى تولەۋگە بولادى. بۇدان باسقا، 2ء-شى قاباتتا كاسىپكەرلەرگە ترەنينگتەر وتكىزىلىپ، زاڭگەرلىك جانە ماركەتينگ قىزمەتتەرى كورسەتىلەدى.
