تازا سۋعا زار بولىپ، تالاي تابالدىرىق توزدىرعان ستەپنوە اۋىلىنىڭ تۇرعىندارى كوپتەن كۇتكەن تازا اۋىز سۋعا قول جەتكىزدى.

گلۋبوكوە اۋدانى ستەپنوە اۋىلىنىڭ تۇرعىندارى تاۋىز سۋسىز وتىرعاندارىنا ونداعان جىلدار ءجۇزى بولدى. اۋىل وسكەمەن قالاسىنىڭ ىرگەسىندە ورنالاسقاندىقتان، قالالىق قوقىس تا وسى اۋىلدىڭ ماڭىنا توگىلەدى، قالالىق زيرات تا ءدال وسى اۋىلدىڭ شەتىندە، ونىمەن قوسا اۋىلداعى شوشقا فەرماسى دا سۋمەن قوسا قورشاعان ورتانى لاستاپ كەلدى.

جەرگىلىكتى تۇرعىندار تازا اۋىز سۋعا زار ەكەنىن ايتىپ تالاي تابالدىرىقتى توزدىرعان ەدى. ەندى مىنە، 60 جىل كۇتكەن تازا سۋ ءار ۇيگە جەتكىزىلىپ باستادى.

-ستەپنوە اۋىلىندا 233 ءۇي بار، وسى ۇيلەردىڭ 80-نە كەڭەس وداعى تۇسىندا سۋ قۇبىرى تارتىلدى. قالعان ۇيلەردى سۋمەن قامتۋ ماسەلەسى ەندى عانا شەشىمىن تاۋىپ وتىر. بىلتىر رەسپۋبليكالىق بيۋدجەتتەن 808 ملن تەڭگە قارجات ءبولىنىپ، قۇبىر سالۋ جۇمىستارى باستالدى.

بۇگىنگى كۇنى سۋمەن جابدىقتاۋ جۇيەسىن قايتا قۇرۋ اياقتالۋعا جاقىن. «اليانس 21» ج ش س مەردىگەرلىك ۇيىمى ەكىنشى كوتەرگىش سورعى ستانسياسىنان اۋىلدىق جەلىگە دەيىن شامامەن 3 كم قۇبىر توسەپ، اۋىل ىشىندە سۋ قۇبىرى جەلىلەرى مەن قۇدىقتاردى ورناتتى. سىيىمدىلىعى 1000 تەكشە مەتر بولاتىن ەكى تازا سۋ رەزەرۆۋارى سالىندى. جۇمىستار اياقتالۋعا جاقىن، - دەدى ۋشانوۆ اۋىلدىق وكرۋگىنىڭ اكىمى ەرىك قۇماروۆ.

بىلتىر مەردىگەر كومپانيا سۋ رەزەرۆۋارىن سالىپ، اۋىلعا دەيىنگى 3 كم قۇبىردى توسەۋ جۇمىستارىن ورىنداسا، بيىل سۋ قۇبىرلارى اۋىل ىشىنە تارتىلدى.

ء-بىزدىڭ اۋىل تۇرعىندارى تازا اۋىز سۋدى 60 جىل كۇتتى. اۋىلداعى سۋ قۇدىعىنان قوڭىرقاي، توت باسقان سۋ شىعادى. سۋدىڭ ساپاسىنا اۋىلدىڭ ىرگەسىندە عاسىرلار بويى تۇرعان زيرات تا، قالالىق قوقىس تا، شوشقا فەرماسى دا اسەرىن تيگىزىپ وتىر. سوندىقتان بۇل سۋدى ءىشۋ مۇمكىن ەمەس.

سوڭعى جىلدارى ءتۇرلى كاسىپورىندار ءۇلبىنىڭ جاعاسىن قازىپ باستاعان سوڭ، قۇدىقتاعى سۋ تارتىلىپ كەتتى. سوندىقتان كولىگى بار تۇرعىندار ۋشانوۆ اۋىلىنان نەمەسە وسكەمەن قالاسىنداعى شمەليەۆ لوگ اۋدانىنان سۋ تاسيتىن. تانىسى جوقتار، اۋىل زەينەتكەرلەرى 500 تەڭگەگە تاكسي جالداپ، سۋلارىن العىزاتىن، - دەپ اتاپ ءوتتى اۋىل تۇرعىنى جانار وسپانوۆا.

بۇل ماسەلەنى ەلدار تۋماشينوۆ گلۋبوكوە اۋدانىنا اكىم بولىپ كەلگەن ساتتە-اق، قولعا الدى. ياعني، وسىدان ەكى جىل بۇرىن اۋىلعا تازا اۋىز سۋدى كولىكپەن جەتكىزىپ تۇرۋ جاعدايىن جاسايدى. سودان بەرى تۇرعىندار ءوز كولىكتەرىمەن سۋ تاسۋدى قويدى. ەكى جىل كولەمىندە كۇن سايىن بەلگىلەنگەن ۋاقىتتا كولىك اۋىلدى ارالاپ، تازا سۋدى تاراتتى. ەندى مىنە كوپتەن كۇتكەن ۇلى تويدىڭ دا اۋىلى الىس ەمەس.

-مەردىگەرلەر جالپى ۇزىندىعى 16،99 كم سۋ قۇبىرلارىن ورناتتى. سۋ قۇبىرلارىن سالۋ جۇمىستارى 97%-عا اياقتالدى. ءقازىر قۇرىلىسشىلار قازىلعان جولداردى قيىرشىق تاسپەن جابۋ جۇمىستارىن جۇرگىزىپ جاتىر، - دەپ قوستى ۋشانوۆ اۋىلدىق وكرۋگى اكىمدىگىنىڭ مامانى شولپان مۋسينا.

جەرگىلىكتى تۇرعىندار بارلىق جۇمىستاردى ءوز كوزدەرىمەن باقىلاپ، كوپتەن كۇتكەن تازا اۋىز سۋدى تاعاتسىزدانا توسىپ ءجۇر.