Taza sýǵa zar bolyp, talai tabaldyryq tozdyrǵan Stepnoe aýylynyń turǵyndary kópten kútken taza aýyz sýǵa qol jetkizdi.
Glýbokoe aýdany Stepnoe aýylynyń turǵyndary taýyz sýsyz otyrǵandaryna ondaǵan jyldar júzi boldy. Aýyl Óskemen qalasynyń irgesinde ornalasqandyqtan, qalalyq qoqys ta osy aýyldyń mańyna tógiledi, qalalyq zirat ta dál osy aýyldyń shetinde, onymen qosa aýyldaǵy shoshqa fermasy da sýmen qosa qorshaǵan ortany lastap keldi.
Jergilikti turǵyndar taza aýyz sýǵa zar ekenin aityp talai tabaldyryqty tozdyrǵan edi. Endi mine, 60 jyl kútken taza sý ár úige jetkizilip bastady.
-Stepnoe aýylynda 233 úi bar, osy úilerdiń 80-ne Keńes odaǵy tusynda sý qubyry tartyldy. Qalǵan úilerdi sýmen qamtý máselesi endi ǵana sheshimin taýyp otyr. Byltyr respýblikalyq biýdjetten 808 mln teńge qarjat bólinip, qubyr salý jumystary bastaldy.
Búgingi kúni sýmen jabdyqtaý júiesin qaita qurý aiaqtalýǵa jaqyn. «Alians 21» JShS merdigerlik uiymy ekinshi kótergish sorǵy stantsiiasynan aýyldyq jelige deiin shamamen 3 km qubyr tósep, aýyl ishinde sý qubyry jelileri men qudyqtardy ornatty. Syiymdylyǵy 1000 tekshe metr bolatyn eki taza sý rezervýary salyndy. Jumystar aiaqtalýǵa jaqyn, - dedi Ýshanov aýyldyq okrýginiń ákimi Erik Qumarov.
Byltyr merdiger kompaniia sý rezervýaryn salyp, aýylǵa deiingi 3 km qubyrdy tóseý jumystaryn oryndasa, biyl sý qubyrlary aýyl ishine tartyldy.
-Bizdiń aýyl turǵyndary taza aýyz sýdy 60 jyl kútti. Aýyldaǵy sý qudyǵynan qońyrqai, tot basqan sý shyǵady. Sýdyń sapasyna aýyldyń irgesinde ǵasyrlar boiy turǵan zirat ta, qalalyq qoqys ta, shoshqa fermasy da áserin tigizip otyr. Sondyqtan bul sýdy ishý múmkin emes.
Sońǵy jyldary túrli kásiporyndar Úlbiniń jaǵasyn qazyp bastaǵan soń, qudyqtaǵy sý tartylyp ketti. Sondyqtan kóligi bar turǵyndar Ýshanov aýylynan nemese Óskemen qalasyndaǵy Shmelev log aýdanynan sý tasityn. Tanysy joqtar, aýyl zeinetkerleri 500 teńgege taksi jaldap, sýlaryn alǵyzatyn, - dep atap ótti aýyl turǵyny Janar Ospanova.
Bul máseleni Eldar Týmashinov Glýbokoe aýdanyna ákim bolyp kelgen sátte-aq, qolǵa aldy. Iaǵni, osydan eki jyl buryn aýylǵa taza aýyz sýdy kólikpen jetkizip turý jaǵdaiyn jasaidy. Sodan beri turǵyndar óz kólikterimen sý tasýdy qoidy. Eki jyl kóleminde kún saiyn belgilengen ýaqytta kólik aýyldy aralap, taza sýdy taratty. Endi mine kópten kútken uly toidyń da aýyly alys emes.
-Merdigerler jalpy uzyndyǵy 16,99 km sý qubyrlaryn ornatty. Sý qubyrlaryn salý jumystary 97%-ǵa aiaqtaldy. Qazir qurylysshylar qazylǵan joldardy qiyrshyq taspen jabý jumystaryn júrgizip jatyr, - dep qosty Ýshanov aýyldyq okrýgi ákimdiginiń mamany Sholpan Mýsina.
Jergilikti turǵyndar barlyq jumystardy óz kózderimen baqylap, kópten kútken taza aýyz sýdy taǵatsyzdana tosyp júr.
