فورۋم جۇمىسىنا ءبىلىم بەرۋ جانە كرەاتيۆتى حابتار، نيدەرلاندىنىڭ، فرانسيانىڭ، يتاليانىڭ، گەرمانيانىڭ، ۇلىبريتانيانىڭ، قىرعىزستاننىڭ، وزبەكستاننىڭ جانە ت.ب. ەلدەردىڭ كرەاتيۆتى سەگمەنتىنىڭ ۇيىمدارى تارتىلعان.
قالا اكىمىنىڭ ورىنباسارى الىشەر ءابدىقادىروۆ Almaty Creative Week اپتالىعىنىڭ سالتاناتتى اشىلۋىندا اتاپ وتكەندەي، الماتىنىڭ كرەاتيۆتى يندۋستريانى دامىتۋعا بارلىق قاجەتتى رەسۋرسى بار.
ونىڭ ايتۋىنشا، بۇگىندە بۇل سالادا قالادا 22 مىڭ كاسىپورىن جۇمىس ىستەيدى. 2021 جىلدىڭ قورىتىندىسى بويىنشا كرەاتيۆتى يندۋستريالار سالاسىنان شاعىن جانە ورتا بيزنەس سۋبەكتىلەرى تولەگەن سالىق سوماسى 5،4 ملرد. تەڭگەنى قۇرادى.
«بۇگىنگى فورۋم الماتى قالاسى جانە كرەاتيۆتى قوعامداستىقتىڭ بارلىق وكىلدەرى ءۇشىن اشىق سۇحباتتاسۋ، تاجىريبە الماسۋ، كرەاتيۆتى يندۋستريالاردىڭ ساپالى جانە پروگرەسسيۆتى دامۋى ءۇشىن جاڭا بيزنەس-ۇلگىسىن انىقتاۋ مۇمكىندىگىن بەرەدى.
ءبىزدىڭ دامۋىمىزدىڭ ۆەكتورى كەلەسى: ساۋلەت، ديزاين جانە زاماناۋي ونەر، مۋزىكا، كينو جانە انيماسيا، ءسان جانە قولونەر، جاڭا مەديا جانە سيفرلىق مادەنيەت، كيبەرسپورت جانە گەيم-ديەۆەلوپمەنت سەكتورلارىندا شوعىرلاناتىن بولادى»، – دەپ اتاپ ءوتتى الىشەر ءابدىقادىروۆ.
سونداي-اق ول كرەاتيۆتى يندۋستريانى ءتيىمدى دامىتۋ ماقساتىندا الماتىدا ءتيىستى ينفراقۇرىلىم قالىپتاستىرۋ، كاسىپكەرلىكتى ىنتالاندىرۋ، سونداي-اق بۇل سالاداعى ءبىلىمدى، داعدىنى جانە قۇزىرەتتى ايگىلەۋ بويىنشا شارالار قابىلداناتىنىن ايتتى.
الداعى جىلدارى الماتىدا 3 كرەاتيۆتى حاب، IT-حاب، قالالىق ۆەنچۋرلىق قور جانە حالىقارالىق دەڭگەيدە ەكى بەينە- جانە دىبىس جازۋ ستۋدياسىن اشۋ جوسپارلانىپ وتىر.
2030 جىلعا قاراي كرەاتيۆتى يندۋستريا سەكتورىن كەشەندى دامىتۋ الماتىنىڭ جالپى وڭىرلىك ونىمىندەگى كرەاتيۆتى يندۋستريالار سالىمىن 5%-عا دەيىن جەتكىزىپ جانە كرەاتيۆتى يندۋستريالار ەكسپورتىنىڭ قىزمەتىن 500 ملن. اقش دوللارىنا دەيىن ارتتىرا وتىرىپ، سالانى ەكونوميكالىق ماڭىزدى سالاعا اينالدىرۋعا مۇمكىندىك بەرەدى.
قازاقستان رەسپۋبليكاسى مادەنيەت جانە سپورت ۆيسە-مينيسترى ەرجان ەركىنبايەۆتىڭ ايتۋىنشا، قازىرگى ۋاقىتتا كرەاتيۆتى يندۋستريامەن بايلانىستى وزگەرىستەر مەن تولىقتىرۋلار كاسىپكەرلىك كودەكسىنە جانە «مادەنيەت تۋرالى» زاڭعا ەنگىزىلۋدە.
الماتى كرەاتيۆتى يندۋستريالار اپتالىعىنىڭ 1-5 قاراشا ارالىعىندا ءوتىپ جاتقانىن ەستەرىڭىزگە سالامىز. ءىس-شارالار شەڭبەرىندە كورمەلەر، پەرفومانستار، شەبەرلىك كلاسستارى جانە كوپتەگەن باسقا دا شارالار ۇيىمداستىرىلاتىن بولادى. بۇدان باسقا، تيمۋر بەكمامبەتوۆتىڭ «پروفيل» ءفيلمىنىڭ پرەمەرالىق كورسەتىلىمى، سونداي-اق الماتى قالاسى مەن الماتى وبلىسى تۇرعىندارىنىڭ اراسىندا Dota 2 تۇرىندە Almaty Creative Week Esports Cup 2022 كيبەرسپورت ءتۋرنيرى وتەدى.
