الماتىنىڭ باس مەملەكەتتىك سانيتار دارىگەرى جانداربەك بەكشين شىلدەنىڭ 3 اپتاسىندا كوروناۆيرۋس ينفەكسياسىنىڭ 12 مىڭنان اسا جاعدايى تىركەلگەنىن ايتتى. بۇل ماۋسىمنىڭ وسى كەزەڭىندەگى كورسەتكىشتەردەن 4 ەسە جوعارى. دەمەك، ونىڭ سوزىنشە، قوعامدا COVID-19-دىڭ تارالۋ قارقىنى جوعارى، سوندىقتان قاتاڭ شەكتەۋ شارالارى ەنگىزىلۋى ءتيىس.
بۇگىندە ينفەكسيا جۇقتىراتىن نەگىزگى ورىندار: بازارلار، قوعامدىق كولىكتەر، مەيرامحانالار، كافەلەر، بارلار، ادامدار كوپ جينالاتىن ساياباقتار مەن جاياۋ جۇرگىنشىلەر كوشەلەرى.
ەپيدەميولوگتاردىڭ ايتۋىنشا، بازارلاردا دەرت جۇقتىرۋ 10 پايىزدان 15،9 پايىزعا دەيىن، ساۋدا نىساندارىندا 31 پايىزدان 39،7 پايىزعا دەيىن، دەمالىس ساياباقتارىندا جانە جاياۋ جۇرگىنشىلەر كوشەلەرىندە – 1،2 پايىزدان 5 پايىزعا دەيىن وسكەن.
"سوندىقتان ۆەدومستۆوارالىق كوميسسيانىڭ ۇسىنىسى بويىنشا كوروناۆيرۋس ينفەكسياسىنىڭ تارالۋىن بولدىرماۋ ءۇشىن شەكتەۋ شارالارىن كۇشەيتۋ جوسپارلاندى. اتاپ ايتقاندا، نىسانداردىڭ جۇمىستارىنا بارىنشا قاتاڭ شەكتەۋلەر قويۋ جوسپارلانىپ وتىر. قالانىڭ باس مەملەكەتتىك سانيتاريا دارىگەرىنىڭ قاۋلىسىنا جاقىن ارادا ءتيىستى تولىقتىرۋلار مەن وزگەرىستەر ەنگىزىلەدى ءارى جاريالانادى"، – دەپ حابارلادى اكىمدىكتەگىلەر.
اكىمنىڭ ورىنباسارى ەرجان باباقۇماروۆ Ashyq-تا جۇمىس ىستەيتىن نىساندار اراسىندا ءتارتىپ بۇزۋشىلاردى انىقتاۋ، جۇمىستارىن كۇشەيتۋدى جانە قوعامدىق ورىندارعا "قىزىل مارتەبەمەن" بارعانداردى جاۋاپقا تارتۋدى تاپسىردى.
بۇدان وزگە، ءموبيلدى مونيتورينگتىك توپتاردىڭ جۇمىسىن InfoKazakhstan ەلەكتروندى پلاتفورماسىنا تىركەۋ ارقىلى جاڭا جۇمىس فورماتىنا كوشىرۋ تۋرالى تاپسىرمالار بەرىلدى.
"ايتا كەتەرلىگى، قولدانىستاعى شەكتەۋلەردى كۇشەيتۋ ينفەكسيانىڭ جاپپاي تاراۋىنىڭ الدىن الۋعا باعىتتالعان، بۇل دەنساۋلىق ساقتاۋ جۇيەسىنە رەسۋرستاردى ءتيىمدى بولۋگە جانە ساپالى مەديسينالىق قىزمەت كورسەتۋگە، توسەك ورىندار مەن مەديسينا پەرسونالىنىڭ تاپشىلىعىن بولدىرماۋعا مۇمكىندىك بەرەدى.
ينفەكسيانى وتباسىندا جۇقتىرۋ 17،7-دەن 19،4 پايىزعا دەيىن وسكەن. سوندىقتان قالالىقتارعا كوروناۆيرۋس ينفەكسياسىنا قارسى ۆاكسينا الۋ قاجەت، بۇل تۇرعىنداردىڭ دەنساۋلىعىن قورعايدى جانە جاقىن ادامداردى دەرتتەن ساقتايدى"، – دەلىنگەن حابارلامادا.
قالالىقتاردىڭ دەنساۋلىعىن قورعاۋ ءۇشىن ۇجىمدىق يممۋنيتەتتى قالىپتاستىرۋ جۇمىستارى ءجۇرىپ جاتىر. بۇگىندە الماتىدا 665 مىڭ ادام ءبىرىنشى كومپونەنتپەن ۆاكسينالاندى. قالادا مەديسينالىق ۇيىمداردا، مەكتەپتەردە، مادەني جانە سپورتتىق مەكەمەلەردە، بازارلاردا جانە قالانىڭ ساۋدا جانە ويىن-ساۋىق ورتالىقتارىندا 212 ۆاكسينا سالۋ پۋنكتى جۇمىس ىستەيدى.
"قالادا ەپيدەميولوگيالىق احۋال كۇرت ۋشىقتى. COVID-19-دىڭ "دەلتا" نۇسقاسىن جۇقتىرۋ ترەندى، "ءۇندى شتاممى" – وسە ءتۇستى. قالادا دەنساۋلىقتى ساقتاۋ مەن ەپيدەميانىڭ الدىن الۋدىڭ جالعىز جولى – تەك ۆاكسينالانۋ. سونداي-اق ءبارىمىز بەتپەردە رەجيمىن جانە الەۋمەتتىك اراقاشىقتىقتى ساقتاۋعا ءتيىسپىز"، – دەپ اتاپ ءوتتى ەرجان باباقۇماروۆ.
ول ەكپە سالدىرۋ، بەتپەردە تاعۋ رەجيمى مەن الەۋمەتتىك اراقاشىقتىقتى قاتاڭ ساقتاۋ ەپيدەميانىڭ ءورشۋى كەزىندە وتە ماڭىزدى ەكەنىن اتاپ ءوتتى.
