Almatynyń bas memlekettik sanıtar dárigeri Jandarbek Bekshın shildeniń 3 aptasynda koronavırýs ınfeksıasynyń 12 myńnan asa jaǵdaıy tirkelgenin aıtty. Bul maýsymnyń osy kezeńindegi kórsetkishterden 4 ese joǵary. Demek, onyń sózinshe, qoǵamda COVID-19-dyń taralý qarqyny joǵary, sondyqtan qatań shekteý sharalary engizilýi tıis.
Búginde ınfeksıa juqtyratyn negizgi oryndar: bazarlar, qoǵamdyq kólikter, meıramhanalar, kafeler, barlar, adamdar kóp jınalatyn saıabaqtar men jaıaý júrginshiler kósheleri.
Epıdemıologtardyń aıtýynsha, bazarlarda dert juqtyrý 10 paıyzdan 15,9 paıyzǵa deıin, saýda nysandarynda 31 paıyzdan 39,7 paıyzǵa deıin, demalys saıabaqtarynda jáne jaıaý júrginshiler kóshelerinde – 1,2 paıyzdan 5 paıyzǵa deıin ósken.
"Sondyqtan Vedomstvoaralyq komısıanyń usynysy boıynsha koronavırýs ınfeksıasynyń taralýyn boldyrmaý úshin shekteý sharalaryn kúsheıtý josparlandy. Atap aıtqanda, nysandardyń jumystaryna barynsha qatań shekteýler qoıý josparlanyp otyr. Qalanyń bas memlekettik sanıtarıa dárigeriniń qaýlysyna jaqyn arada tıisti tolyqtyrýlar men ózgerister engiziledi ári jarıalanady", – dep habarlady ákimdiktegiler.
Ákimniń orynbasary Erjan Babaqumarov Ashyq-ta jumys isteıtin nysandar arasynda tártip buzýshylardy anyqtaý, jumystaryn kúsheıtýdi jáne qoǵamdyq oryndarǵa "qyzyl mártebemen" barǵandardy jaýapqa tartýdy tapsyrdy.
Budan ózge, mobıldi monıtorıńtik toptardyń jumysyn InfoKazakhstan elektrondy platformasyna tirkeý arqyly jańa jumys formatyna kóshirý týraly tapsyrmalar berildi.
"Aıta keterligi, qoldanystaǵy shekteýlerdi kúsheıtý ınfeksıanyń jappaı taraýynyń aldyn alýǵa baǵyttalǵan, bul densaýlyq saqtaý júıesine resýrstardy tıimdi bólýge jáne sapaly medısınalyq qyzmet kórsetýge, tósek oryndar men medısına personalynyń tapshylyǵyn boldyrmaýǵa múmkindik beredi.
Infeksıany otbasynda juqtyrý 17,7-den 19,4 paıyzǵa deıin ósken. Sondyqtan qalalyqtarǵa koronavırýs ınfeksıasyna qarsy vaksına alý qajet, bul turǵyndardyń densaýlyǵyn qorǵaıdy jáne jaqyn adamdardy dertten saqtaıdy", – delingen habarlamada.
Qalalyqtardyń densaýlyǵyn qorǵaý úshin ujymdyq ımýnıtetti qalyptastyrý jumystary júrip jatyr. Búginde Almatyda 665 myń adam birinshi komponentpen vaksınalandy. Qalada medısınalyq uıymdarda, mektepterde, mádenı jáne sporttyq mekemelerde, bazarlarda jáne qalanyń saýda jáne oıyn-saýyq ortalyqtarynda 212 vaksına salý pýnkti jumys isteıdi.
"Qalada epıdemıologıalyq ahýal kúrt ýshyqty. COVID-19-dyń "Delta" nusqasyn juqtyrý trendi, "úndi shtammy" – óse tústi. Qalada densaýlyqty saqtaý men epıdemıanyń aldyn alýdyń jalǵyz joly – tek vaksınalaný. Sondaı-aq bárimiz betperde rejımin jáne áleýmettik araqashyqtyqty saqtaýǵa tıispiz", – dep atap ótti Erjan Babaqumarov.
Ol ekpe saldyrý, betperde taǵý rejımi men áleýmettik araqashyqtyqty qatań saqtaý epıdemıanyń órshýi kezinde óte mańyzdy ekenin atap ótti.
