الماتىدا پوليسيا تۇرعىننان SIM-box تاركىلەدى، - دەپ حابارلايدى Dalanews.kz
الماتى قالاسىندا الماتى پد كيبەرقىلمىسقا قارسى كۇرەس باسقارماسىنىڭ قىزمەتكەرلەرى ق ر ءىىم جانە سولتۇستىك قازاقستان وبلىسىنداعى ارىپتەستەرىمەن بىرلەسىپ ارنايى ءىس-شارا جۇرگىزىپ، ينتەرنەت-الاياقتىق جاساۋ ءۇشىن قولدانىلعان Sim-box قۇرىلعىسىن انىقتادى جانە تاركىلەدى.
ءىس-شارا ناتيجەسىندە ينتەرنەت-ترافيكتى زاڭسىز باعىتتاۋ ماقساتىندا جاپپاي سيم-كارتالاردى پايدالانۋ ارقىلى قىلمىستىق تىزبەكتى ۇيىمداستىرعان جاس جىگىت ۇستالدى. تەرگەۋ دەرەكتەرى بويىنشا، ول جابىق ينتەرنەت-قوعامداستىقتان نۇسقاۋلار الىپ، كريپتوۆاليۋتا تۇرىندە اقى الىپ وتىرعان. قۇرىلعى تاركىلەندى، تەكسەرۋ جۇمىستارى جالعاسۋدا.
- Sim-box قۇرىلعىلارىن پايدالانۋ – الاياقتار ءجيى قولداناتىن تەحنيكالىق ادىستەردىڭ ءبىرى. بۇل قۇرىلعىلار ءنومىردى جاسىرۋعا، قوڭىراۋلاردى بۇرمالاۋعا جانە فيشينگتىك حابارلامالاردى جاپپاي تاراتۋعا مۇمكىندىك بەرەدى. مۇنداي ارەكەتتەر ازاماتتاردى شاتاستىرىپ، قاسكويلەر، ءوزىن بانك نەمەسە مەملەكەتتىك ورگان قىزمەتكەرى رەتىندە تانىستىرىپ، جەكە دەرەكتەردى الداپ الۋعا جاعداي جاسايدى. وسىنداي الاياقتىق تىزبەكتەردىڭ جولىن كەسۋ – ءبىزدىڭ نەگىزگى مىندەتتەرىمىزدىڭ ءبىرى، – دەدى الماتى قالاسى پد كيبەرقىلمىسقا قارسى كۇرەس باسقارماسى باستىعىنىڭ ورىنباسارى ەركەبۇلان قويشىبايەۆ.
جەدەل-ىزدەستىرۋ شارالارى اياسىندا بۇل قىلمىستىق تىزبەككە قاتىسى بار باسقا ادامداردى انىقتاۋ جانە وسىعان ۇقساس دەرەكتەردى اشكەرەلەۋ جۇمىستارى جالعاسۋدا. پوليسيا ازاماتتاردى مۇقيات بولۋعا، جەكە دەرەكتەردى تەلەفون ارقىلى بەرمەۋگە جانە كۇماندى جاعدايلاردا بىردەن "102" نومىرىنە حابارلاسۋعا شاقىرادى.
